देसारयात हमला याःपिन्त कारवाहिया माग
लहनान्यूज | चौलागा चतुर्दशी ११३७ (अप्रिल २५ २०१७)
![](https://www.lahananews.com/sites/default/files/daboo_4.jpg)
नेवाः पत्रकार राष्ट्रिय दबुलिं, पत्रकार दबू यल कचा ज्यासना पुचःया दुजः पत्रकार अजय देसारयात सांघातिक हमला याःपिन्त कारवाहिया माग याःगु दु ।
थौं पत्रकार दबूया केन्द्रिय महासचिवया नेतृत्वय् दबूया पुचलं प्रहरी वरिष्ठ उपरिक्षक ठुले राईयात नापलानाः फोटो पत्रकार देसारयात हमला याःपिं आक्रमणकारीतयत फयांफक्व याकनं ज्वनाः कारवाहि यायेत माग याःगु खः ।
थौं राष्ट्रपति यलया मंगलय् जुयाच्वंगु पुनर्निर्माणया ज्याया निरिक्षणय् झाःगु इलय् दबूया पुचलं अन हे प्रहरी वरिष्ठ उपरिक्षक राईयात नापलानाः निवेदन लःल्हाःगु खः ।
दबूया पुचःपाखें दोषियात कारवाहिया माग यासें महानगरीय प्रहरी परिसर जाउलाख्यःया प्रमूख प्रहरी वरिष्ठ उपरीक्षक ठुले राईयात दोषियात कारवाहि यायेत निवेदन पौया नापं आक्रमणकारीयागु किपा व आक्रमणकारीं गयावःगु स्कुटरया किपा नं लःल्हाःगु खः ।
थःत आक्रमण जुयाच्वंगु इलय् हे फोटो पत्रकार देसारं उगु किपात काःगु खः ।
![](http://www.lahananews.com/sites/default/files/pictures/nibedan2.jpg)
वंगु बैसाख ११ गते फोटो पत्रकार देसार थः जहानलिसें मोटरसाइकलं म्ह्याययात ब्वनेकू तःवनाच्वंगु इलय् सातदोबाटोय् बा. ६३ प. ९८४ ल्याःया स्कुटरय् वःपिन्सं लँ पनाः देसारयात सांघातिक हमला याःगु खः ।
आकाझाकां जुगु हमलाय् थः म्ह्याययात बचे यायेगु कुतलय् थःगु आत्मरक्षा तकं याये मफूगु पत्रकार देसारं धयादीगु दु । आक्रमणय् फोटो पत्रकार देसारया क्यामेराया लेन्सय् नं क्षति जूगु दु ।
निवेदन लःल्हानाकासें प्रहरी वरिष्ठ उपरिक्षक राईं थम्हं कारवाहि प्रक्रिया न्ह्याका हे छ्वयेगु व फक्व याकनं दोषियात कानूनी दायराय् हयाः कारवाहि यानां त्वःतेगु प्रतिवध्दता प्वंकादिल ।
दोषियात कारवाहिया माग यासें प्रहरी परीसरय् जाउलाख्यलय् ब्यूगु उगु निवेदन महानगरीय प्रहरी परिसर चापागाउँ व सातदोबाटोय् बोधार्थ ब्यूगु दु ।