देय् दबूया न्हूगु नेतृत्व ल्ययेत मतदान जुयाच्वन
लहनान्यूज | चौलागा एकादशी ११३७ (अप्रिल २२ २०१७)
![](https://www.lahananews.com/sites/default/files/dey-daboo.jpg)
नेवाःतयगु राष्ट्रिय संगठन नेवाः देय् दबूया खुक्वःगु महाधिवेशनया झ्वलय् दबूया न्हूगु नेतृत्व ल्ययेत आः मतदान जुयाच्वंगु दु ।
दबूया नेतृत्वया नितिं वर्तमान नायः नरेश ताम्रकारं नं दाबी यानादीगु दुसा पवित्र बज्राचार्यं नं नायः पदय् उम्मेदवारी बियादीगु दु ।
छुं दिं न्ह्यः जक सहमति जुइधुंकूगु खँ पिहांवःगु खःसां अन्ततः दाङय् थ्यकाः धाःसा नेतृत्वया नितिं धेंधें बल्लाः हे जूगु दु । अथेखःसां नायःया निम्हं प्रत्याशीपिन्सं नेतृत्वया नितिं जूगु लोकतान्त्रिक अभ्यासयात स्वाभाविक व सहज रुपं कायेमाःगु धाःगु दु ।
नायःया उम्मेदवार नरेश ताम्रकारं निर्वाचनपाखें न्ह्याम्ह हे त्याःसां नेवाः त्याःगु, नेवाः देय् दबू त्याःगु कथं कायेमाःगु धयादिल । अथे हे नायःया मेम्ह प्रत्याशी पवित्र बज्राचार्यं चुनावय् वनेधुंकाः हार वा जीतयात सहज रुपं स्वीकार यायेमाःगु धयादिल ।
खुक्वःगु महाधिवेशनपाखें दबूया न्हूगु नेतृत्वयात ल्ययेगु लिसें ७ प्रदेश दुनेया ७ न्वकू व खुला दुजःपिं ल्ययेत्यंगु दु । मू छ्यान्जे, छ्यान्जे व दांभरिं धाःसा खुलापाखें त्यानावःपिं दुजःपिनिपाखें नं कार्यसमितिं हे ल्यइगु धाःगु दु ।
Categorized in राष्ट्रिय