देय्न्यंक नागया पूजा यानाः झःझः धायेक हन
गुंलाथ्व पंचमी ११४१,साउन २९ शुक्रवाः
थौं नागपञ्चमी, वैदिक सनातन धर्मावलम्वीतय्सं श्रावण शुल्क पञ्चमीया दिनय् छेँय्, पुखुलिइ, तुंथिइ, अले कुण्डय् व नागस्थानय् नागया पूजा यानाः थुगु नखः हन ।
छेँया मू ध्वाखाय् नागया तस्वीर तिकाः पूजा यायेगु प्रचलन दु । थथे पूजा यायेबलय् दच्छियंकं छेँय् नाग, सर्प व बिच्छी लिसेंया जीवं दुःख मबीगु व मि, मलः व हाबलासाया ग्याःचिकुं नं तापाइगु धार्मिक विश्वास दु ।
थौं सुथंनिसें हे येँया नागपोखरी व टौदह, ख्वपया सिद्धपुखू लिसें देय्न्यंकया नागदह, तुं, कुण्ड व नागस्थानय् साया दुरु, जाकि, सितु, खीर, मरिलिसेंया परिकार छायाः नागया पूजा याइपिं म्वःम्वः मुनाच्वंगु दु ।
नागया १२ नां दुसां अनन्त, वासुकी, पद्म, महापद्म, तक्षक, कुलीर, कर्कट व शंख यानाः अष्टनागया पूजा यायेगु चलन दु । ब्रम्हू पुरोहितपिन्सं जय्मांया छेँय् वनाः विधि कथं पूजाआजा यानाः छेँया लुखाय् नाग तिकेगु याइ ।
नाग पूजा यायेधुंकाः बुँ पालेमज्यूगु मान्यता दु । वैदिक मान्यता कथं नागयात ताहाःया जुजु कथं काइ । नाग तंचाःसा अनिष्ट जुइगु धार्मिक विश्वास दु ।
नागं प्रकृतिइ दुगु विषालु ज्वलं सालाकयाः मेपिं जीवयात विषं बचे याइगु विश्वास नं समाजय् दु ।
Categorized in राष्ट्रिय
