दार्चुला घटनाय् भारतीय एसएसबी दुथ्यागु छानवीन समितिया ठहर
गुंलागा दशमी ११४१, भाद्र १६ बुधबाः
![](https://www.lahananews.com/sites/default/files/jayasing.jpg)
दार्चुला घटनाय् भारतीय सुरक्षा बल (एसएसबी) दुथ्यागु छानबिन समितिं ठहर याःगु दु ।
गृह मन्त्रालयं जयसिंह धामी तुइनं कुतुंवंगु घटनाया खँय् छानविन यायेत दयेकुगु समितिं भारतीय एसएसबीया घटनाय् संलग्नता दूगु ठकर याःगु खः । समितिं गृहमन्त्री बालकृष्ण खाँणयात प्रतिवेदन लःल्हागु दु ।
समितिं घटनाय् एसएसबी दुथ्यागु खँय् अनुसन्धान याना दोषीउपर कानुनी कारबाही यायेत इनाप याःगु दु । लिसें धामीया छेँजःयात पाय्छि क्षतिपुर्ति व राहत चूलाकेत भारतीय पक्षलिसे कूटनीतिक माध्यमं कुतः यायेत नं इनाप याःगु दु । लिसें आश्रित छेँजःयात नेपाल सरकारया पाखें पालनपोषण व शिक्षादिक्षाया व्यवस्थापन यायेत नं समितिं सिफारिस याःगु दु ।
प्रतिवेदन लःल्हाना कासें गृहमन्त्री खाणं प्रतिवेदन कार्यान्वयन यायेत सरकार प्रतिबद्ध दूगु धयादील । वयेकलं प्रतिवेदन कार्यान्वयनया प्रक्रिया न्ह्याकेत गृहसचिव टेकनारायण पाण्डेयात निर्देशन यानादील । सरकारं घटनाया छानबीनया नितिं गृहमन्त्रालयया सह सचिव जर्नादन गौतमया कजिसुइ छानबीन समिति गठन याःगु खः ।
छानबिन टोलीइ प्रहरी नायव महानिरीक्षक पुरुषोत्तम कँडेल, राष्ट्रिय अनुसन्धान विभागया निर्देशक हुतराज थापा, सशस्त्र प्रहरीया एसएसपी सुरेशकुमार श्रेष्ठ व दार्चुलाया सहायक प्रमुख जिल्ला अधिकारी ज्योत्सना भट्ट दुजः दूगु खः ।
साउन १७ य् गठन जूगु समितियात न्हापा १०न्हू दुने छानबिन प्रतिवेदन लःल्हायेगु ई बिउगु खः । लिपा प्रतिवेदन लःल्हायेगु ई थप याःगु खः ।
Categorized in राष्ट्रिय