थौं २६ क्वःगु महानगर दिवस
नृपेन्द्रलाल श्रेष्ठ | कछलागा आमै ११४१, मंसिर २९ सोमवाः
थौं येँ महानगरपालिकां २६ क्वःगु महानगर दिवस हनेत्यःगु दु । राष्ट्रिय सभागृहय् १०ः३० वजेनिसे मूपाहाँ कथं संघीय मामिला तथा सामान्य प्रसाशनमन्त्री हृदयेश त्रिपाठी झायादीगु त्यःगु खः।
थौं जुइगु ज्याझ्वलय् ज्यापु समुदायया ६३ गू परम्परागत गुथि, खड्गी समुदायया ६० गू परम्पराग गुथिया बाजं गुरु, २३ गू गुंला बाजं खलः, येँयाःबलय् पिहां वइगु लाखे, पुलुकिसि, दीप्याखं, सवःद्यः लिसें जनबहाःद्यःया पँय्ताः बाजंयात नं सम्मान याइगु ग्वसाः दु । थुगुसी बाजं गुरुपिंत म्हतिं ३० द्वः तका दां लिसें हनापौ लःल्हाइगु ज्याझ्वः दु ।
अथे ह थुगुसीनिसें ‘मेयर अवार्ड’ नाप येँ महानगरया न्हापांम्ह जननिर्वाचित सभापति मदुम्ह जनकमान श्रेष्ठया नामं स्वनातःगु ‘जनकमान श्रेष्ठ स्वशासन पुरस्कार’, ज्याय् खटे जुयाच्वंपिं न्याम्ह जनप्रतिनिधि व न्याम्ह कर्मचारीयात उत्कृष्ट सम्मानया लिसें उत्कृष्ट वडा घोषणा याइगु नं ज्याझ्वः दु । अथे हे झिम्ह पत्रकारतय्त सुशासन सिरपाः बीगु नं ग्वसाः दु । लिसें कन्हय् हे महानगरया म्ये नं सार्वजनिक यायेगु ज्याझ्वः दु ।
अथे हे थौं न निसे येँ महानगर जलस्येँ (किड्नी) सम्बन्धी ल्वचं बचे जुइगु बारे जनचेतना ब्वलंकेत ‘जलस्येँ बचे याये नु’ अभियान नं घोषणा यायेत्यंगु दु ।
Categorized in राष्ट्रिय
