थौं हिन्दु नेपाली मिसातय् हरितालिका तीज, अपसं च्वनाः भगवान शिवया आराधना यानाच्वन
ञंलाथ्व तृतीया ११४१, भाद्र २४ बिहीवाः
थौं हिन्दु नेपाली मिसातय् हरितालिका तीज । देय्न्यंकं थ्व पर्वयात तःजिक्क हनाच्वंगु दु ।
सरकारं निषेधाज्ञा चिइकूगुलिसे थौं मिसातय् तःजिक्क तीज हनाच्वंगु दु । म्हिगः दर नयाः च्वंपिं मिसातय्सं थौं न्हिच्छि अपसं च्वनाः भगवान महाद्यःयात पूजा यायेगु चलन दु ।
तीज पर्व जूगुलिं देय्न्यंकंया महाद्यःयाथाय् पूजापाठ याइपिं मिसातय् भीड खनेदु । हरेक दँ भाद्र शुक्ल तृतीयाकुन्हु हनीगु थ्व पर्वय् महाद्यःयात विशेष पूजा आराधना याइ । अपसं च्वनाः शिव पार्वतीया पूजा व उपासना यासा पारिवारिक सुख, शान्ति व कल्याण चूलाइगु धार्मिक विश्वास दु ।
सत्ययुगय् हिमालय पुत्री पार्वतीं पशुपतिनाथ, गौरीघाटय् च्वनाः तपस्या यायेवं महाद्यः मिजंया कथं वरदान चूलाःगु विश्वास यानातःगु दु । अनंनिसें अपसं च्वनेगु चलन न्ह्याःगु पौराणिक मान्यता दु । ईहिपा जुइधुंकूपिं मिसातय्सं अटल सौभाग्य अले सन्तान प्राप्तिनिसें ईहिपा मजूनीपिं ल्यासेतय् योग्य मिजं चूलाइगु धइगु कामना यानाः अपसं च्वनीगु खः ।
छुं हे मनःसें अपसं च्वनीगु, पूजा आराधना याइगु अले तीजया म्येय् प्याखँ हुलाः थौं न्हिच्छि न्ह्याइपुकीगु खः । स्वास्थ्य अवस्था कमजोर जूपिन्सं छुचुंमरी, कःनिया मरि अले सिसाफल नयाः अपसं च्वनेज्यूगु संस्कृतिविद्तय्सं धागु दु ।
चिकित्सकतय्सं धाःसा कोरोना महामारीया जोखिम आःन दुगुलिं भौतिक दूरी कायम यायेत अले उप्वः भीडभाड मयाःसें तीज पर्व हनेत इनाप याःगु दु ।
Categorized in राष्ट्रिय
