थौं विश्व वातावरण दिवस
लहनान्यूज | कछलागा दशमी ११४१, जेठ २२ शनिबाः
थौं विश्व वातावरण दिवस, नेपालय् नं थी थी ज्याझ्वया ग्वसाःग्वःया हनेज्या जुयाच्वंगु दु ।
संयुक्त राष्ट्रसंघया महासभां दँय्दसं जुन ५ य् वातावरण दिवस हनेगु घोषणा याः कथं नेपालय् नं थुगु दिवस हनेत्यंगु खः । तर कोरोना महामारीया हुनिं थुगुसिइ नेपालय् छुं नं सार्वजनिक ज्याझ्व धाःसा तःगु मदु ।
मानव सिर्जित हुनिं प्रकृति व प्राकृतिक प्रणालीइ लाःगु प्रतिकुल प्रभावयात म्हो याना वातावरण संरक्षण यायेगु खँय् नेपालं थुगुसिइया नारा ‘नयाँ सोच र सिर्जना, प्राकृतिक प्रणालीको पर्नुस्थापना’ क्वजिउगु दु । संयुक्त राष्ट्रसंघं सन् २०२१ निसें २०३० तक्कया दशकयात परिस्थितिकीय प्रणालीया पुनःस्थापनाया दशकया कथं हनेत आह्वान याःकथं थुगु नारा क्वजिउगु वन तथा वातावरण मन्त्रालयं न्ह्यथंगु दु ।
थ्वहे दथुइ राष्ट्रपति विद्यादेवी भण्डारीं विश्व वातावरण दिवसयात नेपाःया संविधानं प्रदत्त याःगु स्वच्छ वातावरणय् जीवन हनेदइगु हकयात सार्थक दयेकेत प्रण यायेगु दिंया कथं कायेमाःगु धयादीगु दु । सकसिनं थः जःखःलय् दूगु वातावरण भिंकेगु व वायु, जल लिसें भूमि प्रदूषणपाखें लानाच्वंगु लिच्वः म्हो यायेत नेपालं थी थी अन्तर्राष्ट्रिय मञ्चय् तःगु विषय व याःगु प्रतिबद्धता कार्यान्वयन यायेगु निति ंथुगु दिवसं तंसा च्वछाइगु राष्ट्रपति भण्डारीं भलसा प्वंकादीगु दु ।
मनूखं याःगु प्राकृतिक स्रोतया अप्वःगु दोहनया हुनिं जःखःया पारिस्थितिकीय प्रणालीइ हे असन्तुलन ब्वलंगुलिं थुकियात पुनःस्थापना यायेत प्रकृतिमुखी जीवनशैली नालाकासें वातावरण भिंकेगुया ज्यापहः प्रवद्र्धन यायेत वयेकलं आह्वान यानादीगु दु । प्रचुर जैविक विविधता लिसें प्राकृतिक सम्पदां तःमि नेपालय् पूर्वाधारया विकास याइबलय् दिगो विकासया अवधारणायात आत्मसात् यासें न्ह्याये फूसा ‘समृद्ध नेपाः, सुखी नेपामिया राष्ट्रिय आज्जु चूलाकेगुलिइ ग्वहालि चूलाइगु वयेकलं भलसा प्वंकादीगु दु ।
अथेहे प्रधानमन्त्री केपी शर्मा ओलीं वातावरणीय कुतःलय् सरकारं न्ह्यागु पलाः फलदायी जूगु धयादीगु दु । वयेकलं प्राकृतिक सन्तुलन च्वयेक्वये जूबलय् हलिंमय् खनेदूगु थी थी महामारीलिसे नापं जाना सामना यायेत नं इनाप यानादीगु दु ।
Categorized in राष्ट्रिय
