थौं राष्ट्रिय बाल दिवस
ञंलाथ्व अष्टमी ११४१, भाद्र २९ मंगलवाः
थौं ५७क्वःगु राष्ट्रिय बाल दिवस । देय्न्यंक थीथी ज्याझ्वः यानाः थुगु दिवस हनीगु जूगु दु । ‘सामान्य अवस्था वा कोभिड महामारी’ नारा लिसें हनीगु दिवसय् मस्तय्गु अधिकारया नितिं ज्या यानाच्वंगु थीथी संघसंस्था अले ब्वनेकूतय्सं बिस्कं बिस्कं ज्याझ्वःया ग्वसाः ग्वइगु जूगु दु ।
सरकारं दँय्दसं भदौ २९ गतेयात राष्ट्रिय बाल दिवस घोषणा यानाः चेतनामूलक ज्याझ्वः न्ह्याकावःगु दु । देय्या थीथी थासय् आः नं बालश्रम शोषण जुयाच्वंगु, मस्त मीगु अले ब्वनेकू वने मखंपिं मस्तय्गु ल्याः नं यक्व दुगु अधिकारकःमितय्सं धयाच्वंगु दु ।
उमिगु कथं येँय् दुपिं सडक मचातय् अवस्था नं उत्थें हे दनि । येँलिसें देय्न्यंक आः ५द्वः स्वयां अप्वः सडक मस्त दुगु तथ्यांक दु । थ्व हे दथुइ, महिला, बालबालिका तथा जेष्ठ नागरिक मन्त्रालय व राष्ट्रिय बालअधिकार परिषदं मंकाः रुपं निन्हुतक हनीगु बाल दिबसया मू आकर्षण सडक मचा मुक्त राष्ट्र दयेकेगु अभियान अन्तर्गत सडकनिसें रंगशालातक्क स्ट्रिट टु स्टेडियम ज्याझ्वः दयेकूगु दु । थुगु ज्याझ्वलय् सडकं उद्धार यानाहःपिं ४० मचातय् ब्वति दइ ।
थ्वहे दथुई राष्ट्रपति विद्यादेवी भण्डारीं मस्तय्के दुगु प्रतिभायात पिब्वयाः भविष्यया जिम्मेवार नागरिक दयेकेत न्ह्यज्यायेगु राज्यया दायित्व खःगु धयादीगु दु । राष्ट्रिय बाल दिवस, २०७८ या झ्वलय् भिन्तुना हसना ब्युसें राष्ट्रपति भण्डारीं बालअधिकारया सम्बन्धय् व्यवस्था याःगु संवैधानिक अले कानूनी प्रावधानया प्रभावकारी कार्यान्वयन यायेत राज्यया स्वंगुलिं तहया संरचना, अभिभावक, ब्वनेकू व मुक्कं समाजया भाला खःगु धकाः धयादीगु दु ।
अथेहे प्रधानमन्त्री शेरबहादुर देउवां मस्तय्गु नितिं कोभिड १९ विरुद्धया खोप उपलब्ध याकेगु सम्बन्धय् सरकारं फक्व कुतः यानाच्वंगु दुगु धयादीगु दु । राष्ट्रिय बाल दिवसया झ्वलय् भिंतुना हसना ब्युसें प्रधानमन्त्री देउवां कोभिड–१९ संक्रमणं प्रभावित मस्तय्गु लागिं प्रत्येक कोभिड अस्पतालय् म्ह्वतिं २० प्रतिशत शैयाया व्यवस्था यानागु दाबी यानादीगु दु । कोभिड–१९ या नकारात्मक लिच्वलं मस्तय्त तापाकातयेत मस्तय्गु शिक्षा, स्वास्थ्य अले संरक्षणया विषयस तँसा कुतः आवश्यक दुगु वय्कःया धापू दु ।
Categorized in राष्ट्रिय
