थेच्वय सहश्र जलधारा हायेका: माघ हा:वन
लहनान्यूज | सिल्लाथ्व द्वादशि ११३७ ( फेव्रुअरी ८ २०१७ )
नेवाः बस्ति यलया थेच्वय् नेवाः परम्परा कथं माघ महिनाय् जुइगु माघ हाःवनेगु ज्याझ्वः अन्तिम इलय् थ्यंगु दु ।
थ्यंमथ्यं लच्छि न्ह्यवःनिसें जुयाच्वंगु माघ हाः वनेगु झ्वलय् शुक्रबाः थेच्वया पीगं लागा निसें हरि भजन यानाः देयया थीथी थाय् चाःहिउगु खः । अथे चाःहिलेगु झ्वलय् दक्कले न्ह्यःने सहश्र जलधारा हायेकाः वइगु खःसा वयां लिपा जःसिइ लः तयाः उकी मनूयात तयाः कुबिया हयेगु चलन दु ।
अथे जःसिइ तयाः मनू कुविया हइगुयात महाद्यवं थम्हं त्वंगु विष सिलु तीर्थय् वनाः शान्त याःगु कथं विश्वास याना वयाच्वंगु दु । थथे चाहिलेगु झ्वलय् मनूत थःगु म्हय् पाल्चा च्याकाः देय् चाःहिलेगु नं याइगु खः ।
नापं कृष्णया ध्वाँयया प्रतीक कथं मस्तयसं कापःया ध्वाँय् नं ज्वनावयेगु याइसा उगु इलय् महाद्यःया नन्दी कुन्दनी आदि देवगणया रुपं ख्या:चा नं हयेगु याः ।
Categorized in राष्ट्रिय