"तिलोत्तमा गोल्डकप फुटबल" विहिवाःनिसें न्ह्याइगु
लहनान्युज | ने.सं. ११३८ चिल्लागा षष्ठी (७ फेब्रुअरी २०१८)
![](https://www.lahananews.com/sites/default/files/kipa-madu_17_20.jpg)
कन्हय् विहिवाःनिसें बुटवलया देवीनगरय् जुइगु २०क्वःगु संस्करणया “तिलोत्तमा गोल्डकप” फुटबल कासाय् स्वंगू विभागीय पुचःलिसें १०गू पुचलं ब्वति काइगु जूगु दु ।
ग्वसाः खलः जिल्ला फुटबल संघ, रुपन्देहीं थौं बुधवाः छगू पत्रकार सम्मेलन यानाः कासाय् ब्वति काइगु पुचःया बारे जनकारी ब्यूगु खः ।
कासाय् नेपाल पुलिस क्लब, सशस्त्र प्रहरीया एपीएफ क्लब, त्रिभूवन आर्मी क्लबलिसें ग्वसाः खलः रुपन्देही ११, मनाङ्ग मस्र्याङ्गदी, थ्रीस्टार क्लब, फ्रेण्डस् क्लब, कास्की ११, झापा ११ व सुदूर पश्चिमाञ्चल यानाः १०गू पुचलं धेंधेंबल्ला याइगु संघया नायः दीर्घबहादुर केसीं जानकारी बियादिल ।
स्थानीय एन्फा टेक्निकल सेन्टरय् जुइगु उगु फुटबलया उलेज्या कासाय् ग्वसाः खलः रुपन्देही ११ व सुदूर पश्चिमाञ्चल दथुइ धेंधेंबल्ला जुइगु व फाइनल कासा चैत्र ३ गते जुइगु नं जानकारी बियादीगु खः ।
कासाया बिजेतायात उपाधिया नापनापं ७गू लख ७७द्वः ७७७ तकालिसें लुँया पदक बीगु जुइसा उपविजेतायात ४गू लख ४४द्वः व ४४४तका बीगु नं नायः केसीं जानकारी बियादिल । अथे हे कासाजःछिया दकलय् बांलाःम्ह कासामियात छगः मोटरसाइकल, उत्कृष्ट विधागपाखें डिफेण्डर, गोलकिपर, मिडफिल्डर, फरवार्ड व प्रशिक्षकयात म्हतिं २१द्वः व १११तका बीगु जुइ ।
उगु कासा क्वचायेकेत थ्यंमथ्यं ८६गू लखतका खर्च जुइगु अनुमान याःगु दु ।
Categorized in कासा