ताम्रकार समाजया जेहेन्दार ब्वँमिपिन्त छात्रवृत्ति
बछलाथ्व नवमी ११३९ (मे १३ २०१९)
ताम्रकार समाजपाखें छगू ज्याझ्वःया दथुइ समाजया जेहेन्दार ब्वँमिपिंलिसें आर्थिक समस्याय् लाःपिं छगू तगिंनिसें स्नातक तगिंतकया झिंन्याम्ह ब्वँमिपिन्त थ्यंमथ्यं निगू लख तका बराबरया आर्थिक छात्रबृत्ति लःल्हाःगु दु । अथे हे निम्ह ब्वँमिपिन्त पूवंक हे छात्रबृत्ति लःल्हाःगु खः ।
ताम्रकार समाजया शिक्षा उपसमितिपाखें ग्वसाः ग्वःगु उगु ज्याझ्वलय् समाजया नायः रविन्द्रराज ताम्रकारं ब्वँमि व अभिभावकपिन्सं प्राप्त जूगु छात्रबृत्तिया पाय्छिकथं उपयोग याय्माःगु खँय् बः बियादिसें समाजय् यक्व धेबा दयाः छात्रबृत्ति लःल्हाःगु मखुसें उकी दातापिनिगु हि चःतिया कमाइ दुथ्यानाच्वंगु खँ धयादिल ।
आर्थिक अभावया हुनिं सु नं ताम्रकारवर्ग शिक्षापाखें बञ्चित मजुइमा धइगु तातुना लःल्हाःगु उगु छात्रबृत्ति वइगु दिनस ‘पूर्ण छात्रबृत्ति’या ल्याः अप्वय्का यंकेगु उपसमितिया कजि प्रबल ताम्रकारं धयादिल । ज्याझ्वलय् ल्यूकजि अमिता ताम्रकारं नं थःगु नुगःखँ तयादीगु खः।
