नेवाः गुथि टोखाया ग्वसालय् छगु न्हुदँ हनेयेगु ज्याझ्वः जुगु दु।

उगु ज्याझ्वलय् परम्परागत बाँसुरी खलः व दापा खलःपिन्स ब्बति काःगु खः। ज्याझ्वःया मूपाहाँ टोखा नगरपालिकाया मेयर प्रकाश अधिकारीं स्वन्ति नाप न्हुदँ ११४१ या सकिसित भिंतुना बियादीसे टोखाया जिवित द्यः गणेश व कुमारीयात दँच्छि छगु छगु लाख बिइगु घोषणा यानादीगु दु।

अथेहे तलेजु द्यःया थाय् छगु लाख व ५० हजार बिइगु धका धयादिगु खः। टोखा नगर दुने जात्रा पर्व नाप संस्कृतिया लागि छगु करोडया अक्षयकोषया घोषणा यानादीगु दु। उगु अक्षयकोषया लागि गजराज ट्रष्ट, ज्ञानवीर स्मृति, भाइलाल व जमराज स्मृतिपाखे निगु निगु लाख ग्वाहालि यायेगु बचं बिगु खः।

गुथिया नायः देवनारायण डंगोलया सभाध्यक्षताय् जुगु उगु ज्याझ्वलय् पाँहा कथं नेवाः देय् दबूया सचिव झायादिगु खः।

उगु ज्याझ्वःया समन्वय टोखा संस्कृति संरक्षण बिकास समिति याःगु खः।

Categorized in राष्ट्रिय