टेकू अस्पतालय् न धरौटी ध्यवा फ्वन
लहानान्युज | कौलागा पारु ११४०,कार्तिक १६ आइतवा:
![](https://www.lahananews.com/sites/default/files/uu%20%2855%29_0.jpg)
शुक्रराज ट्रपिकल तथा सरुवा रोग अस्पताल नं कोरोना संक्रमितपिनिगु वासः यायेत धरौटी कायेगु सुरु याःगु दु।
निश्चित वर्ग बाहेंक मेगु निःशुल्क वासः मयायेगु स्वास्थ्य तथा जनसंख्या मन्त्रालयया निर्णय कथं कात्तिक १४ गतेनिसे कोरोना संक्रमितपिन्त वासः शुल्क कायेगु निर्णय जुगु धका अस्पतालं धाःगु दु।
अस्पतालं आईसीयूसहित भेन्टिलेटरय् तयेमाःपि बिरामीया लागि न्हि १५ हजार वासः खर्च तोके याःगु दु सा ५० हजार धरौटी रकम जम्मा यायेत धाःगु दु।
आईसीयू बाहेक भेन्टिलेटरय् दुपि बिरामीपिन्स न्हि ७५०० उपचार खर्च लगे जुइगु व ३० हजार धरौटी तयेमाः। क्याबिन आइसोलेसनय् च्वनिपिन्स न्हि ७५०० व ग्रास्ट्रो आइसोलेसनय् च्वनिपिन्स न्हि ३५०० वासः खर्च पुलेमाः। उमिस ३० व २० हजार धरौटी जम्मा याये मा धका अस्पतालं छगू सूचं पिकाःगु दु।
परिव परिचयपत्र वा सम्बन्धित पालिकाया सिफारिस, ७० दँ पुले धुकुपि जेष्ठ नागरिक, अति अपाङ्गता जूपि परिचयपत्र, अशक्तताया प्रमाणपत्र व याकः मिसाया प्रमाणपत्र दुपिन्त उपचार शुल्कय् छुट बिइगु दु।
अस्पतालया प्रमुख वरिष्ठ कन्सल्टेण्ड व निर्देशकया लिखित निर्णयय् विरामीया आर्थिक अवस्था, औचित्यता व आवश्यकताया आधारय् वासः खर्चय् १० प्रतिशत निसे शतप्रतिशत तक छुट बिइ फइगु धका अस्पतालं धाःगु दु।
![](https://www.lahananews.com/sites/default/files/pictures/teku.jpg)