टि–ट्वेन्टी विश्वकपय्ः अष्ट्रेलियां बुकल श्रीलंकयात
कौलागा अष्टमी ११४१, कात्तिक १२ शुक्रबाः
![](https://www.lahananews.com/sites/default/files/aus_7.jpg)
विश्वकप टि–ट्वेन्टी क्रिकेटय् अष्ट्रेलियां मदिक्क निगूगु कासा त्याकूगु दु ।
न्हापांगु कासाय् दक्षिण अफ्रिकायात बुकूगु अष्ट्रेलियां वंगु बहनी जूगु निगूगु कासाय् श्रीलंकायात ७ विकेटं बुकाबिल । दुबईलय् टस बुनाः न्हापां व्याटिङ याःगु श्रीलंकां २० ओभरय् ६ विकेट तंकाः सच्छि व ५४ रन दयेकल ।
लिसलय् सच्छि व ५५ रनया आज्जु अष्ट्रेलियां १७ ओभरय् ३ विकेट तंकाः पूवंकल । उकिया लागिं डेभिड वार्नरं ६५ रन दयेकल । कासा त्याःगुलिसें अष्ट्रेलियां पुचःया शिर्ष थासय् दुगु इंग्ल्याण्डलिसे ल्याः ज्वलिंज्वः याःगु दु ।
निगुलिं टोलीं निगू कासां ४–४ ल्याः मुंकूगु दु । अष्ट्रेलियां आः स्वंगूगु कासाय् शनिबाः इंग्ल्याण्डलिसे म्हिती । थ्व कासाय् छगू टोलीया शत प्रतिशत जितया यात्रा क्वचाइगु निश्चित दु ।
विश्वकप टि–ट्वेन्टी क्रिकेटय् थौं निगू कासा जुइ । न्हिनय् जःछि पाः ४ताः इलय् सारजहाँलय् बंगलादेशं वेष्ट इंडीजलिसे म्हितीबलय् बहनी जःछि पाः ८ताः इलय् दुबइलय् अफ्गानिस्तान व पाकिस्तान चुलिंचू लाइ ।
Categorized in कासा