जोनसनया निर्वाचन सम्बन्धी प्रस्ताव बेलायती संसदपाखें निक्वःखुसी अस्वीकृत
लहना न्यूज | ने.सं. ११३९ ञलाथ्व द्वादशि (१० सेप्टेम्बर, २०१९), मंगलवाः
![](https://www.lahananews.com/sites/default/files/boris%20jonson.jpg)
बेलायती प्रधानमन्त्री बोरिस जोनसनं तयादीगु निर्वाचन प्रस्ताव अनया हाउस अफ कमन्सं निक्वःखुसी नं अस्वीकृत याःगु दु ।
यूरोपेली युनियनं पिहां वनेगु अर्थात ब्रेक्जिट प्रस्ताव संसदपाखें अस्वीकृत जुइधुंकाः हतास जुयाः बोरिसं अक्टोबर १५य् चुनाव यायेगु प्रस्ताव संसदय् यंकादीगु खः । तर जोनसनया उगु प्रस्ताव निक्वःखुसी नं सांसदतसें अस्वीकृत याःगु खः ।
बिबिसीकथं २९३ सांसदतसें जक जोन्सनया प्रस्तावय् समर्थन याःगु खः । निर्वाचन प्रस्ताव पारित जुइगु नितिं दुई तिहाई अर्थात ४३४कू मत माःगुली १४१कू मत मगाःगु खः ।
विपक्षीतसें जक मखु, सत्तारुढ दलया सांसदतसें नो–डिल ब्रेक्जिट सम्बन्धी विधेयक पारित याके मबीवं जोनसनं निवार्चन याकेत स्वःगु खः । तर सत्तारुढया नापनापं विपक्षी दलया सांसदतय्त ब्रेक्जिटया नितिं बाध्य यायेत जोनसनं निर्वाचनया कार्ड छ्यःगु धासें विरोध प्वंकूगु खः ।
बेलायत यू्रोपियन युनियनपाखें पिहां वनेगु ईया सीमा अक्टोबर ३१ खः । उगु अवधिइ विना सम्झौता हे जूसां बेलायत इयूपाखें अलग्ग जुइगु सम्बन्धी कानून दय्केगु नितिं हःगु विधेयकया पक्षय् वंगु वालय् ३०१ मत व विपक्षय् ३२८ मत लाःगु खः ।
जोनसनया प्रस्तावय् बेलायतया संसद आः न्यावाःया नितिं निलम्बित जुइ । सम्झौतापाखें लिहां वयेधुंकाः बेलायतया संसदं यूरोपेली युनियनय् हे च्वनेगु वा पिहां वनेगु सम्बन्धी कानून पारित यायेमाः ।
Categorized in अन्तर्राष्ट्रिय