जुडोया कासामी सोनियां न्हापांगु कासा रुसया इरिनालिसे म्हितिइगु
दिल्लाथ्व त्रयोदशी ११४१,साउन ७ बिहीवाः
टोक्यो ओलम्पिक अन्तर्गत जुडोया नेपाली कासामी सोनिया भट्टं न्हापां कासा रसियाया डोल्गोभा इरिनालिसे म्हितिइगु जूगु दु । सोनियां न्हापांगु कासा जुलाई २४ गते म्हितेत्यंगु खः ।
विहीबाः पिदंगु कासा धलः कथं ४८गू तौल पुचःया सोनियाया न्हापांगु कासा इरिनालिसे म्हितिगु पक्का जूगु खः । डोपिङ प्रकरणया हुनि प्रतिबन्ध जूगु रुस ओलम्पिकय् देय्या नामं ब्वति मदुगु खः ।
रसियाया कासामीपिन्सं रुस ओलम्पिक कमिटिया ध्वाँय्या क्वहे धेँधेँबल्ला याइगु जूगु खः । इरिनां मे महिनाय् जूगु कजान ग्रान्डस्लामय् केँय्या तक्का तकं त्याकेत ताःलागु खः ।
नेपाःया सोनिया भट्ट धाःसा विश्व वरियताय् सच्छि व २७गू थासय् लाम्ह कासामी खः । वाइल्डकार्डपाखें ओलम्पिकय् दुथ्याम्ह सोनिया व प्रशिक्षक सूर्यनारायण श्रेष्ठ छुं दिं न्ह्यः हे टोकियो थ्यंगु खः ।
Categorized in कासा
