जुजु जयप्रकाश मल्लया पालंनिसें न्ह्नाच्वंगु येँयाः जात्राया जीवित देवी व देवता श्री कुमारी, श्री गणेश व श्री भैरवया म्हिगः संकल्प पूजा जूगु दु ।

संकल्प पूजाया नितिं श्री गणेश व श्री भैरवयात कुमारी छेँ बिज्याका स्वम्ह द्यःपिन्त पुज्यात । उगु संकल्प पूजाया नितिं दक्व पूजा ज्वलं राष्ट्पति भवन थ्यंका पूजा संकल्प याना हःगु खः । थथे संकल्प याना हःगु पूजा ज्वलपाखें गुरुजुं श्री कुमारी, श्री गणेश व श्री भैरवयात पुज्यानाबिज्यागु खः । परापूर्वकालंनिसें न्ह्यानाच्वंगु व सांस्कृतिक पर्वकथं नालातःगु येँयाःया झ्वलय् जात्रा यानातःपिं जीवित द्यः श्री गणेश (संवेग शाक्य) व श्री भैरव (रुजन शाक्य) उमेर हदया हुनिं नियमकथं विदाई याना वय्कया थासय् मेपिं नियुक्ती यायेत शाक्यपिनिगु १६गू विहारय् सूचं प्रवाह याना संकलन जूपिं शाक्य कुलपुत्रपिनिगु निवेदन व जातःया लिधंसाय् न्हूपिं द्यः ल्येगु चलन दु ।

उगु पंचाग निणर्ायक समितिया सिफारिस कथं देय्या अवस्थालिसे सुथांलाःगु गुणदोष, लक्षण व नक्षत्रया लिधँसाय् थुगुसी भाष्कर देव संस्कारित केशचन्द्र कृत पारावर्त महाविहार इतुंबहालया शाक्य कुलपुत्र रोदिन शाक्ययात न्हूम्ह गणेद्यःया रुपय् वि.सं. २०७७ पौष ३ गते व श्री भैरवया रुपय् कीर्तिपुण्य महाविहार क्वहिटी बहाःया शाक्य कुलपुत्र कर्सनव शाक्ययात वि.सं. २०७७ पौष ४ गतेया दिं विधिकथं प्रतिस्थापन याःगु खः ।

म्हिगःया उगु संकल्प पूजाय् आमन्त्रित्र जूपिं दक्वसित प्रसादकथं भ्वय् नकूगु खः । उगु वलय् पूर्व शिक्षा विज्ञात लिसें प्रविधि मन्त्री कृष्ण गोपाल श्रेष्ठ, येँ महानगरपालिका उपप्रमुख हरिप्रभा श्रेष्ठ खड्गी, बागमती सांसद राजेश शाक्य, अजय क्रान्ति शाक्य, शोभा शाक्यलिसें नेपाल सुनचाँदी व्यवसायी संघया मानिक शाक्य, तेजरतन शाक्यलिसें मेमेपिं गन्यमान्यपिनिगु ब्वति दूगु खः ।

स्रोतः सामाजिक सञ्जाल

Categorized in राष्ट्रिय