जनबहाः द्यः जात्रा न्यायेकेत ब्यवस्थापन समिति नीस्वन
लहनान्युज | चिल्लागा एकादशी ११३८ (मार्च १३ २०१८)
जनबहाः द्यः जात्रा तःजिक न्यायेकेत ब्यवस्थापन समिति नीस्वन थौं मंगलवाः येँ महानगरपालिकाया बोर्ड हलय् सेतो मच्छिन्द्रनाथ रथयात्रा ११३८ व्यवस्थापन समितिइ जनबहाः द्यःया गुरुजुलिसें येँ २५ वडाया वडाध्यक्ष निलकाजी शाक्यया कजि सुइ नीस्वंगु दु ।
थौं जुगु उगु मुज्या येँ महानगरपालिकाया प्रमुख विद्यासुन्दर शाक्य, येँ जिल्ला प्रशासन प्रमुख केदारनाथ शर्मा, येँ महानगरपालिकाया कार्यपालिकाया दुजःपिनिगु उपस्थितिइ दुगु खः ।
थौंया भेलाय् उपस्थित जुयादीपिं सकलसित दुजःकथं ल्यःगु दु ।
अथेहे, येँ महानगरपालिकाया मेयर, जिल्ला प्रशासनया प्रमुख, जात्राया रुटय् लाःगु वडाया वडाध्यक्षपिन्त व्यवस्थापन समितिया संरक्षक कथं ल्यःगु दु ।
उगु मुँज्याय् येँ महानगरपालिकाया प्रमुख विद्यासुन्दर शाक्यं जात्रा भव्य सभ्य कथं न्यायेकेत इनाप यानादिसें वय्कलं महानगरपालिकां जात्राया नितिं यायेमाःगु सकतां ज्याखँ यायेगु बचं बियादिगु खः ।
येँ जिल्ला प्रशासनया प्रमुख केदारनाथ शर्मां जात्राया नितिं सकतां कथंया शान्ति सुरक्षाया व्यवस्था यायेगु बचं बियादीगु खः । अथेहे, गुथि संस्थानया प्रमुख बैकुण्ठ प्रसाद रेग्मीं जात्राया नितिं गुथि संस्थानं यायेमाःगु ज्याखँ न्ह्याकेधुंकूगु जानकारी बियादीगु खः ।
जनसेवा प्रहरी वृत्तया प्रमुख टेकुनन्द इवालिम्बुं जात्रा जुइगु थाय्या ल्याखं सुरक्षाया भाला जनसेवा प्रहरी वृत्तया खःसां मंकाः कथं सुरक्षा व्यवस्था मिलेयानाः ज्या यायेगु जानकारी बियादिल
।
अथेहे, नेपाल विद्युत प्राधिकरण रत्नपार्कया प्रमुख थीरकुमार खत्रीं जात्राया इलय् लँपुइ दथुइ लानाच्वंगु तारया ब्यवस्थापन यायेगु जानकारी बियादीगु खः ।
अथेहे, ज्याझ्वलय् नेपाल रेडक्रस सोसाइटी काठमाडौं प्रमुख लिसें येँ १७ वडाया वडाध्यक्ष नवीन मानन्धरं दँय् दसंथें थुगुसी नं रेडक्रसया उपस्थिति दइगु जानकारी बियादिल ।
उगु ज्याझ्वलय् स्काउट, विपद् ब्यवस्थापनया लिसें थीथी संघसंस्थापाखें जात्राया नितिं यायेमाःगु ज्याखँयात कयाः थःथःगु विचाः प्वंकादीगु खः ।
उगु मुँज्याय् थीथी उपसमिति व ज्याया भाला बिइगु नितिं कन्हय् बुधवाः ९ ता इलय् नेपाः ब्यांक्वेटय् सेतो मच्छिन्द्रनाथ रथयात्रा ११३८ व्यवस्थापन समितिया न्हापांगु बैठक च्वनेगु निर्णय याःगु दु ।
थौंया मुँज्या समितिया नायः येँ २५ वडाया वडाध्यक्ष निलकाजी शाक्यया सभापतित्वय् जूगु खःसा ज्याझ्वः नेवाः जागरण मञ्चया नायःलिसें समितिया दुजः सुजीव बज्राचार्यं न्ह्याकादीगु खः ।