जनताया धार्मिक साँस्कृतिक आस्थाय् प्रहार याःगु : राजेन्द्र श्रेष्ठ
नृपेन्द्रलाल श्रेष्ठ | बछलाथ्व अष्टमी ११३९ (जुन १० २०१९)
![](https://www.lahananews.com/sites/default/files/64258379_10216733047671419_3432708871381057536_n.jpg)
समाजवादी पार्टी, नेपालया सहअध्यक्ष राजेन्द्र प्रसाद श्रेष्ठं गुथि विधेयकया नामं जनताया धार्मिक साँस्कृतिक आस्थाय् प्रहार याना तधःगु गल्ती याःगु धका धयादिगु खः ।
छगु ज्याझ्वलय् सहअध्यक्ष श्रेष्ठं गुठी सम्बन्धी कानुनया एकीकरण व संशोधन याये त्यःगु विधेयकया सन्दर्भय् संघीय समाजवादी नेवाः संघ व नेवाः राष्ट्रिय परिषदया मंकाः ग्वसालय् ‘गुुठी विधेयक व नेवाः सरोकार’ विषयलय् विचार गोष्ठीइ अथे धयादिगु खः ।
उगु ज्याझ्वःया मूपाँहा श्रेष्ठं जेठ २६ गते येँया माइतीघर मण्डलाय् गुथि विधेयकया विरुद्धय् जुगु शान्तिपूर्ण जनप्रदर्शनय् प्रहरी हस्तक्षेप व अन्धाधुन्ध लाट्ठीचार्ज, लःया फोहरां छ्वाकां राज्य आतंक याःगु द्धपः न बियादिगु खः।
सहअध्यक्ष श्रेष्ठं गुठी संस्थान तक खारेज याये माःगु माग जुया च्वंगु इलय् प्राधिकारयुक्त संस्था दयेका संयुक्त राष्ट्रसंघ व आइ.एल.ओ. १६९ या प्रदत्त परम्परागत कानुन छ्यले दइगु आदिवासी पिनिगु अधिकारया विरुद्ध खः धका धयादिगु खः ।
उगु ज्याझ्वलय् पंचलाल महर्जन, केदारभक्त माथेमा, हिसिला यमि व नरेशवीर शाक्य न थःथःगु नुँगः खँ तयादिगु खः ।