छत्रपाटी अस्पतालय् लिफ्ट तयेत येँ महानगरपालिकापाखें ग्वाहालि
बिकाश | कौलागा सप्तमी ११४० (२०७७ कार्तिक २२)
![](https://www.lahananews.com/sites/default/files/chhetrapati_1.jpg)
येँया पुलांगु वस्ती क्षेत्रपाटीइ दुगु छत्रपाटी निःशुल्क चिकित्सालय अस्पतालया न्हूगु भवनय् लिफ्ट जडान यायेत येँ महानगरपालिकां ३० लख तका अनुदान ब्यूगु दु ।
अनुदान ग्वाहालि यायेगु सम्झौतापत्रय् येँ महानगरपालिकापाखें शहरी पूर्वाधार विकास विभागया प्रमुख रामबहादुर थापा व चिकित्सालययापाखें नायः डाक्टर मनोजमान श्रेष्ठं ल्हाःचिं तयादिल ।
उगु इलय् कामपा प्रमुख शाक्यं थप सेवा प्रवाह व चिकित्सालयया उन्नतिया लागिं जनताया नं अपनत्व महशुस याकेत जनसहभागितापाखें नं ग्वाहालि मुंकेत सुझाव बियादिल ।
प्रमुख शाक्यं चिकित्सालया न्हूगु भवन दयेकेत आर्थिक दँ २०७७/०७८ य् ५ करोड तका बजेट विनियोजन यानागु नं लुमंका बियादिल ।
व झ्वलय् शाक्यं येँ महानगरपालिका दुने कोभिड–१९ रोकथाम व नियन्त्रणया लागिं दक्वं जानाः न्ह्याःवनेमाःगु बिचाः नं तयादिल ।
चिकित्सालयया नायः डाक्टर श्रेष्ठं २५ शैय्याया चिकित्सालयं कोभिड–१९ या संक्रमण भयावह जुयाच्वंगु इलय् नं छेँय् छेँय् हे वनाः सेवा बियाच्वनागु जानकारी याकादिल ।
वय्कलं करीब ३५ करोडया लगानीइ अत्याधुनिक भवन दयेकेगु तयारीइ चिकित्सालय जानाच्वंगु धासें भवन दयेकेत महानगरपालिकां ५ करोड ग्वाहालिया प्रतिवद्धता प्वंकूगुलिं थःपिं अझ उत्साहित जूगु धयादिल ।
वय्कलं आः चिकित्सालयपाखें, स्वासप्रश्वास, दन्त सेवा लिसेंया विशेषज्ञ स्वास्थ सेवा बियाच्वनागु नं धयादिल ।
Categorized in राष्ट्रिय