चिनाखँ मुँज्या व अन्तरक्रिया
ध्रुब मधिकःमि | सिल्लागा अष्टमी ११३८ (फ्रेअवरी ८ २०१८)
![](https://www.lahananews.com/sites/default/files/Nepal-Bbhasa-Parishad.jpeg)
नेपालभाषा परिषदया ग्वसालय् चिनाखँय् दइगु तत्व व उकिया प्रभावकारितायात कया अन्तरक्रियाया नापं चिनाखँ ब्वनेगु ज्याझ्वः जूगु दु । नेपालभाषा परिषदया इनापय् झायादीम्ह अमेरिकी कवयित्री विला सेनेबर्गया मू पाहाँसुइ थुगु ज्याझ्वः जुगु खः ।
परिषदया नायः सुवर्ण शाक्यया सभाध्यक्षय् जुगु ज्याझ्वलय् प्रतिसरा साय्मिं न्ह्याकादीगु खः । ज्याझ्वलय् चिनाखँया संरचनायात कया च्वमिपिं नापं सहलह नं जूगु खः । ज्याझ्वलय् कवयित्री सेनेबर्गं चिनाखँया थासा व सम्प्रेषणया खँय् न्ववासें चिनाखँया प्रभावकारितायात ध्यानय् तया अनुभूतिया खँ न्ह्यब्वयेगु इलय् कविपिं सचेत जुइमागु बिचाः प्वंकादिल ।
भाय्हिलातगु चिनाखँ स्वये धुंकाः नेपालभाषाया चिनाखँ स्तरीय जूगु व हलिमय्हे च्वन्ह्याये फैगु खँ वयेकलं कनादिल ।
ज्याझ्वलय् कवयित्री विलाया नापं कविपिं योगेन्द्र प्रधान, वंशी श्रेष्ठ, केशवमान शाक्य, नविन चित्रकार, पुष्परत्न तुलाधर, प्रतिसरा साय्मी, सुदन खुसः, सुलोचना मानन्धर, पुष्पराज राजकर्णिकार, श्रीराम श्रेष्ठ, सुधीर ख्वबि, रजनीमिला, शाक्य सुरेन, भगतदास श्रेष्ठ व नारद बज्राचार्यपिंसं थःथःगु चिनाखँ ब्वनाःन्यंकादीगु खः ।