गुठी विधेयकया वार्तपाखे समाधान यायेत मानवअधिकार आयोगया इनाप
लहनान्युज | तछलाथ्व ११३९ (जुन १३ २०१९)
![](https://www.lahananews.com/sites/default/files/images_0.jpg)
राष्ट्रिय मानवअधिकार आयोगं गुठी सम्बन्धीे विधेयकया विषयलय् खनेदुगु समस्यामा समाधान यायेगु लागि वार्ता वा संवाद पाखे लँपु मालेत सरकारयात इनाप याःगु दु ।
गुठी सम्बन्धी विधेयकयात कया संघर्षय् वया च्वंपिन्त सरकारं बल छ्यगु यात कया आयोगं छगु विज्ञप्ति जारी यासे सरकार नाप थथे इनाप याःगु खः ।
आयोगया निर्देशक डा. टीकाराम पोखरेलं पितनादिगु विज्ञप्तिइ शान्तिपूर्ण याये दइगु प्रदर्शनय् नागरिकया अधिकारया सम्मान यायेत सरकारयात अथे इनाप यानादिगु खः । अथेहे घाइतेपिन्त स्वास्थ्य उपचार यायेत व दोषीयात कानूनी कारवाहीया दायरा हया वार्ता यायेगु लागि आयोगं सरकारयात माग याःगु खः ।
सरकारं सङ्घीय संसदय् दर्ता याःगु गुठी सम्बन्धीे विधेयक खारेजीया माग यासे वःगु जेठ २६ गते गुठीयार नाप अधिकारकःमि पिन्स याःगु प्रदर्शनय् प्रहरीं बल छ्यला प्रदर्शनकारी घाइत जुगु खः ।
अथेहे आयोगं विरोध ज्याझ्वः न संयमित जुया न्हयाकेत प्रदर्शनकारीयात इनाप न याःगु दु ।
सांस्कृतिक अधिकार मानवअधिकारया हे अभिन्न अङ्ग जुगु खँ न्ह्यथेनादिसे आयोगं परम्परा निसे न्ह्याना वयाच्वंगु थीथी जातिया संस्कृति लोप जुइगु अवस्था मवयेकेत संवेदनशील जुया वनेत सरकारयात सुझाव न बिगु दु ।