ख्वप नगरपालिकाया ग्वसालय् धाँ बाजं कासा
हसना लवजु, ख्वप | पोहेलाथ्व पारु ११३९ (जनवरी ७ २०१९)
ख्वपया दत्तात्रय देगः दुगु तचपाः त्वालय तःजिक धेधेंबल्ला जुगु खः । थुकिइ ख्वप नगरय् दुगु थीथी वडापाखें मुक्कं स्वीछगू पुचलं ब्वति काःगु खः ।
धेधेबल्लाय् नासः हैमा बाजा खलः न्हाप लाःगु खः । नृत्यनाथ दाफा भजन खलः ल्यू लाःगु खःसा एभरेष्ट ईङ्गिलस स्कूलया धाँ बाजं खलः लियाँल्यू लाःगु खः । अथेहे राइजिङ्ग कल्चर ग्रुप व आकाश भैरव नौ बाजा भजन गुठी ‘क’ पाखें सान्त्वना शिरपा त्याकेत ताःलाःगु खः ।
ज्याझ्वःया मू पाहाँ नेपाल मजदुर किसान पार्टीया नायः नारायणमान बिजुक्छेँ त्याःगु नापं ब्वति काःगु सकल पुचःयात शिरपा लःल्हानादीगु खः । न्हाप लाःगु पुचःयात शिरपा कथं स्वीद्वँतका ध्यबा नापं छगः धाँ बाजं व छज्वः छज्वः भुछ्या व सिछ्या लःल्हाःगु खः ।
अथेहे ल्यू लाःगु पुचःयात नीन्याद्वँतका ध्यबा नापं धाँ बाजं व भुछ्या लःल्हाःगु खःसा लियाँल्यू लाःगु पुचःयात नीद्वँतका ध्यबा नापं धाँ बाजं व सिछ्या लःल्हाःगु खः । सान्त्वना शिरपा त्याकूगु निगू पुचःयात म्हतिं झिद्वँ भिद्वँतका ध्यबा व धाँ बाजं लःल्हाःगु खः ।
नाप धेधेबल्लय् ब्वति काःगु दक्व पुचःयात प्रोत्साहन कथं छगः छगः धाँ बाजं शिरपा कथं लःल्हाःगु खः । ज्यझ्वलय् न्ववानादिसें मू पाहाँ बिजुक्छेँ ख्वपय् बाजागाजाय् तसकं हे सःपिं गुरुपिं दुगु धयादिसें ख्वपयात बाजागाजाया अथवा संगीतया विश्वविद्यालय दयेकेगु सम्भावना तकं दुगु न्ह्यथनादिल ।
ख्वपया नेवाःतय्सं परम्परागत शीप छ्यलेगु ज्यायात न्ह्याकाच्वंगु धयादिसें मेमेगु थासय् च्वँपिं सिबें नं ख्ववासीपिन्सं थःगु संस्कृतियात बाँलाक न्ह्याकाच्वंगु खँ नं वय्कलं तयादीगु खः । येँ यलय् व मेथाय् गननं देगः व सम्पदा दयेकेमाःसा पुरातत्व विभागं अज्वःगु ज्याया शीप दुपिं मनूत ख्वपय् माःवयेमालीगु धयादिसें बिजुक्छेँ गर्व यानादिल ।
झिम्ह बाजं गुरुपिन्सं थुगु धेधेंबल्लाया निर्णायक जुयामूल्यांकन यानादीगु खः । ज्याझ्वलय् न्ववानादिसें मूल्यांकन समितिया सदस्य विष्णु बहादुर मानन्धरं धार्मिक बोल नापं मनोरञ्नात्मक बोल दुगु अले थायेत यक्व मनूत माः धइगु मदुगुलिं युवा पुस्ता धाँ बाजंप्रति आकर्षित जुयावःगु खँ कनादिल ।
छुं नं कथंया धेधेंबल्ला जुइबले धाँ बाजं थाना थःगु पक्षया मनोबल अप्वकेगु व शत्रु पक्षया नुगलय् धाःसा ग्याचिकु व भ्रम ब्वलंकिगु धयादिसें थुगु बाजंया सांस्कृतिक पक्षयात कयाः न्ववानादीगु खः ।
ख्वप नगरपालिकाया वडा नम्बर ९ या नायः रबिन्द्र ज्याख्वं ज्यझ्वः न्ह्याकादीगु खः ।
किपाः –हसना लवजु, ख्वप