ख्वपय् लखं चुइकाः ट्रक चालक वेपत्ता
रामगोपाल तमखु | तछलागा पञ्चमी ११४०
![](https://www.lahananews.com/sites/default/files/bkt-lahana.jpg)
ख्वपय् थौं तसकं वा वयाः चुनदेवीइ लँय् बाः वःगु लखं एलपी ट्रकया चालक छम्ह चुइका यंकाः बेपत्ता जूगु दु ।
ख्वपय् थौं न्हिनय् करिव बाघौ ति तसकं वःगु वां उगु थाय्या लँ दक्वं लखं जायाः खुसिबाः वयेथें बाः वःगु खः ।
अरनिको राजमार्ग अन्तर्गत ६ लेन सडक पाण्डुबजार चोक व सल्लाघारी चोकया दथुइ लाःगु चुनदेवी बस स्टपय् लाःगु धलय् बाःवःगु लखं ना ६ ख १६१६ ल्याःया एलपी ट्रकया चालकयात चुइकूगु खः ।
बेपत्ता ट्रक चालक सिन्धुली रानीचुरीयाम्ह थौंकन्हय् मकवानपुर हेटौँडा लामसुरे च्वनीम्ह ५७दँया नर बहादुर रावत खःगु महानगरीय प्रहरी परिसर ख्वपया सूचना अधिकृत दिपक गिरीं धयादिल ।
बेपत्ता चालकया मालेज्या जुयाच्वंगु नं सूचना अधिकृत गिरीं कनादिल ।
उगु थायया सर्भिस ट्र्याकया लँ दक्वं लखं जाःगु थासय् सल्लाघारीं सुर्यबिनायक पाखे वनाच्वंगु एल पी ट्रकया चालक गाडीं कुतुंवनाः लखय् दुनावंबलय् लखं पाईप दुने चुइकायंकूगु स्थानीय प्रत्यक्षदर्शीं धाःगु दु ।
Categorized in राष्ट्रिय