कोरोना संक्रमित अप्वयावंगुया जिम्मेवार सु ?
![](https://www.lahananews.com/sites/default/files/field/image/Coronavirus4_0.jpg)
जुजुमान महर्जन
![](https://www.lahananews.com/sites/default/files/pictures/juju_1.jpg)
थौंकन्हय् कोरोना संक्रमित जूपिनिगु ल्याः न्हियांन्हिथं अप्वया वनाच्वंगु दु । थ्व हे हुनिं भारत सीमानालिसे स्वानाच्वंगु व व्यापारिक दृष्टिकोणं तसकं महत्वपूर्ण जुयाच्वंगु निगू महानगरपालिकाय् हाकनं लकडाउन याःगु दु । बीरगञ्ज महानगरपालिकाया अवस्था स्वय्गु खःसा कोरोना समुदायस्तरय् न्यनावंगु जक मखु, तसकं ग्यानापूगु अवस्थाय् थ्यनेधुंकूगु दु धइगु न्हियान्हिथं संक्रमितया ल्याः अप्वयावनाच्वंगु व संक्रमितपिं सिनाच्वंगु जक मखु, आइसोलेसन मदयाः होम आइसोलेसनय् च्वनेमाःगु अवस्था दु ।
नकतिनि जक धनुषाया छम्ह ल्याय्म्हं आत्महत्या यात । थुकिया कारण नं कोरोना संक्रमणया नापनापं समाजं यानाच्वंगु व्यवहार खः । तर थ्व स्वयां नं महत्वपूण खँ धइगु भारतं लिहाँ वय्धुंकाः वय्कः संक्रमण पुष्टि जूगु खःसा झिन्हुतक क्वारेन्टाइनय् नं च्वंगु खः । व लिपा विना पिसिआर टेष्ट मयासे छेँय् लितछ्वय्गु ज्या प्रशासनं यात । कोरोना मदु धइगु निक्र्यौल जुइमफूगु हुनिं समाजं नं छिछि व दूरदूर याय्वं सम्बन्धित थासय् अनुनय विनय याःसां नं पिसिआर टेष्ट मयाःगु हुनिं अन्ततः आत्महत्याया लँपु लित ।
मेगु बझाङ्गय् नकतिनि ६६म्ह मनूत कोरोना संक्रमित लूगु दु । भारतं वःपिं उमित १४न्हुतक क्वारेन्टाइनय् तय्गु ज्या जुल, तर पिसिआर टेष्ट यानाः इलय् हे रिपोर्ट मवःगु हुनिं उपिं छेँ वन । तर वंगु शुक्रवाः व सञ्चरवाः रिपोर्ट वःगु इलय् सकलसिके कोरोना भाइरस संक्रमित खनेदत । आः उमिसं गुलि मनूतय्त कोरोना न्यंकेधुंकल जुइ, उकियात कयाः अनुमान याय्गु बाहेक मेगु छुं मदु । थुकिं यानाः कोरोना समुदाय स्तरय् न्यनावनेधुंकल धाःसां पाइमखु ।
नकतिनि लकडाउन चाःबलय् स्वनिगलं दुहाँ वइपिं मनूतय्त पिसिआर टेष्ट याय्माः वा टेष्ट याःगु रिपोर्ट हय्माः धकाः धाःबलय् सरकारं उकियात हाथ्याः बीकथं पिनें वःपिं मनूतय्त आरडिटी वा पिसिआर टेष्ट याय्माःगु आवश्यकता मदु, उमित होम क्वारेन्टाइनय् ती धकाः निर्देशन ब्यूगु खः । उगु इलय् नं आः स्वनिगलय् कोरोना भाइरस संक्रमण न्यनावनीगु जुल धकाः सकस्यां अनुमान याःगु खः, तर उकियात सरकारं बक्तब्यबाजी याय्गु स्वयां खास हे च्यूताः मक्यन ।
आः वयाः अनुमान याःकथं स्वनिगलय् न्हियांन्हिथं न्यय्म्हया ल्याखय् संक्रमित जूपिं पहिचान जुयाच्वंगु दुगु जक मखु, अखबतं सरकारं हे जनता भाइरस संक्रमण जुइगुपाखें बचय् जुइत पूवंकेमाःगु नियमत पाय्छिकथं नाला मकयाच्वंगु व थथे जुल धाःसा भयावह स्थिति पिहांवइ धकाः ख्याच्वः बीगु शुरु यानाहल । अझ छुं दिं न्ह्यः संक्रमित जूपिनिगु ल्याः म्हो जूगु इलय् समुदायस्तरय् न्यनावंगु मदु धकाः बक्तब्यबाजी याःगु खः, जब कि पिसिआर परीक्षण याय्गु ज्या हे म्हो यानागु खः धकाः स्वीकार मयाः । अथे हे, स्वनिगलय् दुहांवइपिं मनूतय्के परीक्षण यानाच्वनागु दु धकाः धाःसां संक्रमित जूपिं मनूत याउँक हे दुहांवयाच्वंगु महाबौद्धया नारायणी कम्प्लेक्सय् पसः दुपिं वीरगञ्ज निवासीपिन्सं क्यनाबिल, गुपिं कोरोना संक्रमण पुष्टि जूगु खः । थ्व ला कोरोना संक्रमण समुदायस न्यनावंगुया छुं छुं दसूत जक खः ।
खय्त ला बाध्यताबश जनता नं कोरोना भाइरस न्यंकेगुली छुं छुं जिम्मेवार दु । गथे कि सामाजिक तथा भौतिक दूरी कायम मयाःगु, मास्क पाय्छिकथं मछ्यःगु, मछ्यलेगु वा हेलचक्राइ याय्गु ज्या जूगु दु । थ्व स्वयां नं सरकार वा सम्बन्धित पक्षं हे थुकियात गम्भीरतापूर्वक मकाःगुलिं हे संक्रमण न्यनावनाच्वंगु दु धाःसां पाइमखु, अझ पिसिआर हे टेष्ट मयासे क्वारेन्टाइनय् च्वनाच्वंपिन्त छेँ छ्वयाः कोरोना मुक्त जूपिं धकाः ल्याः जक अप्वय्केगु ज्या सरकारं यानाच्वंगु दु । सरकारं पिसिआर टेष्ट याय्गु हलंज्वलं हे मदु, वा मानवीय श्रोतसाधन हे मदु धकाः स्पष्ट याय्माल, अले व हे कथं नीतिनियम दय्काः पालना याय्माल÷याकेमाल । मखुसा संक्रमण न्यनावंगुया द्वपं जनतायात जक बियां थःगु जिम्मेवारपाखें लिचिले फइमखु ।