केन्यालिसेया कासाय् नेपालया शानदार जीत
लहनान्यूज | चिल्लागा पारु ११३७ (मार्च १३ २०१७)
![](https://www.lahananews.com/sites/default/files/nepal.jpg)
विश्व क्रिकेट लिग च्याम्पियनसीप अन्तर्गत थौं नेपालं केन्यालिसे म्हितूगु निगूगु कासा ७ विकेटं त्याकूगु दु ।
थौं किपूया ख्यलय् जूगु कासाय् १५६ रनया हाथ्यालिसें कुहांवःगु नेपालं ३० ओभर २ बलय् ३ जक विकेटया क्षतिइ कासा त्याकूगु खः । केन्यालिसेया न्हापांगु कासाय् बुइधुंकाः थौं ब्यालेन्स बलिङ व फिल्डिङ लिसें उत्कृष्ट ब्याटिङ यासें नेपालं थौंया कासा त्याकाकाःगु खः ।
गेम फिनिसर धकाः तकं म्हस्यूम्ह शरद भेषवाकरं ३० ओभरया निगूगु बलय् छक्का थ्वाःगु लिसें थौंया कासा नेपालय् ल्हातय् लाःगु खः । न्यागूगु ल्याखय् ब्याटिङ याःवःम्ह भेषावकरं ११ बलय् २४ रन दयेकूगु खः ।
![](http://www.lahananews.com/sites/default/files/pictures/Sharad-Vesawkar.jpg)
नेपालया पाखें कप्तान ज्ञानेन्द्र मल्लं ९३ बलय् ६४ रन दयेकल । अथे हे थःगु निगूगु कासाय् हे दिपेन्द्र ऐरीं ६६ बलय् ६२ रन दयेकुसें थःगु न्हापांगु अर्धसतक पूवंकल ।
ओपनर सुनील धमला व स्वंगूगु ल्याखय् वःम्ह ब्याट्समायन सागर पुन धाःसा १ व ५ रनय् हे आउट जुल ।
केन्याया लागिं ओटिनों २ विकेट कालसा ओबुवां १ विकेट काल ।
थ्वयां न्ह्यः नेपालं तसकं हे संयमित व उत्कृष्ट बलिङ यासें केन्यायात १५५ रनय् पनाब्यूगु खः । नेपालया लागिं भेषावकरं ४ विकेट काल सा महबुब आलमं सनसनीपूर्ण बलिङ यासें ७ ओभरय् ५ मेडन तयाः २ विकेट काल ।
स्पिनर बसन्त रेग्मीं २ विकेट कालसा सागर पुन व सन्दिप लामिछानें १, १ विकेट काल ।
Categorized in कासा