कीर्तिपूण्य महाविहारया देगः जिर्णोद्धार लिपा उलेज्या
नृपेन्द्रलाल श्रेष्ठ | कछलागा चतुर्दशी ११४० (नोभेम्वर २५ २०१९)
![](https://www.lahananews.com/sites/default/files/lag.jpg)
येँया लगमय् कीर्तिपूण्य महाविहारया देगः जिर्णोद्धार लिपा उलेज्या जूगु दु । २०७२या तःभुखाचं क्षतिग्रस्त जूगु देगःया जिर्णोद्धार लिपा औपचारिक उलेज्या जूगु खः । वंगु सन्चरबाः येँ महानगरपालिका वडा ल्याः २१य् च्वंगु कीर्तिपूण्य महाविहार लगं बहालय् येँ महानगरपालिकाया प्रमुख विद्यासुन्दर शाक्यं देगःया उलेज्या यानादीगु खः ।
उगु इलय् वौद्ध परम्पराकथं देगःया पूजा नं जूगु खः । पूजा क्वचाय्धुंकाः जूगु औपचारिक ज्याझ्वलय् येँ महानगरपालिकाया प्रमुख शाक्यं सतः, फल्चा, विहार, महाविहार, देगःलिसें येँय् दुगु थीथी पुरातात्विक, धार्मिक, साँस्कृतिक महत्वया सम्पदाया पुनःनिर्माण महानगरपालिकाया नीति व दायित्व तकं खःगु धयादिल ।
येँ महानगरपालिकां न्हूगु निर्माणयात निषेध हे यानाः पुनःनिर्माणयात प्राथमिकता बियागु धयादिसें माःगु थासय् येँ महानगरपालिका व स्थानीय गुथ्याःपिनिगु पहलय् ज्या न्ह्यःने यंकेगु प्रतिबद्धता शाक्यं प्वंकादिल ।
![](https://www.lahananews.com/sites/default/files/pictures/la.jpg)
गुलिखे थासय् गुथि संस्थान व पुरातत्व विभागं बांलाक्क समन्वय याय्मफयाः समस्या जूसां पुनःनिर्माणया नितिं येँ महानगरपालिकायाके आर्थिक स्रोतया अभाव मदुगु प्रमुख शाक्यया धापू खः ।
मुक्कं ४९लख तकाया लागतय् देगःया दय्केज्या क्वचाःगु खः । देगःया पुनःनिर्माण दच्छिं दय्के सिधय्केगु आज्जु तःगु खःसा आज्जु कथं हे ज्या क्वचाःगु खः ।
कीर्तिपूण्य महाविहार स्वनिगःया न्हापांगु महाविहार जूगु धाःगु दु । बिम्विसारं कपिलवस्तुइ आक्रमण याःगु इलय् ल्वहं छगः ज्वनाः येँय् बिस्युंवःपिं शाक्यतय्गु छगू पुचलं व हे ल्वहं स्थापना यानाः थुगु महाविहार पलिस्था याःगु धयातःगु दु ।