कीर्तिपुर नगरपालिकां निगूगु चरणया राहत वितरण प्रक्रिया न्ह्याकल
नृपेन्द्रलाल श्रेष्ठ | बछलाथ्व पारु ११४०,बैसाख ११ गते
![](https://www.lahananews.com/sites/default/files/kirtipur.jpg)
कीर्तिपुर नगरपालिकां निगूगु चरणया राहत वितरणया लागिं प्रकिया न्ह्यःने यंकूगु दु ।
संघीय सरकारं निगूगु चरणया राहत बीगु वा मबीगु धकाः निर्णय मयाःनिगु इलय् नं नगरपालिकाया कार्यपालिका बैठकं निर्णय यानाः निगूगु चरणया राहत वितरणया लागिं न्ह्यज्याःगु खः ।
स्थानीय सरकार ऐन २०७४या मर्म व संघीय सरकारं स्थानीय तहयात राहत वितरणया ज्या लःल्हाःगु अवस्थायात स्वयाः नगरपालिकां १ निसें १० वडाय् राहत आवश्यक जूगु परिवारय तथ्यांक मुंकाच्वनागु नगरपालिकाया उपप्रमुख सरस्वती खड्कां जानकारी बियादिल ।
तथ्यांक मुनेज्याय् राहत आवश्यक जूगु गुगुं नं परिवार त्वःमफीमा धकाः वडा ज्याकू, नगरनिसें वडास्तरतक्कया सर्वदलीय संयन्त्र गठन याःगु दु ।
‘दक्वं पक्षया सहभागिताय् तथ्यांक मुंकाच्वनागु दु । न्हापांगु चरणया राहत नं सर्वदलीय संयन्त्र मार्फत वितरण यानागुलिं राहत वितरण विवाद रहित हे जुल’ उपप्रमुख खड्कां धयादिल । निगूगु चरणय् राहत माःगु परिवारया ल्याः ५० प्रतिशतं थहांवनीगु नं उपप्रमुख खड्काया अनुमान दु ।
नगरपालिकां न्हापांगु चरणय् ४१सः व ५२ परिवारयात राहत ब्यूगु खः ।
थीथी जिल्लां उच्च शिक्षाया लागिं किपुलिइ च्वनावयाच्वंपिं गुलिखे विद्यार्थीतयसं राहत मब्यू धाःगु न्यनेदुनि धइगु न्ह्यसलय् नगरपालिका प्रमुख रमेश महर्जनं राहत वितरणया झ्वलय् वडापाखें व त्रिभुवन विश्वविद्यालयलिसे समन्वय यानाः नं राहत वितरण यानागु जानकारी बियादिल ।
सच्छि व ३५ विद्यार्थीतयत विश्वविद्यालय परिसरय्, अनलाईन फाराम जायेकूपिं ४सः व ५९ विद्यार्थीयात छेँय् छेँय् राहत इनागु नगरपालिकां न्ह्यथंगु दु । नगरपालिकाया कथं त्रि.वि महिला छात्रवासय् २०म्हेसित गाःगु व मिजं छात्रवासय् ७१म्हेसित गाक्क राहत वितरण याःगु दु ।
राहत माःपिं विद्यार्थीं नगरपालिकाया अनलाईन फारम जायेकेफइगु नं नगरपालिकां न्ह्यथंगु दु । सरकारया निर्देशन कथं व समस्याय् लाःपिं सकसितं राहत वितरणय् प्राथमिकताय् तयागु नं वयकःया धापू दु ।
गुलिखे मनूतयुं एकद्वार प्रणालीमार्फत राहत वितरण यायेगु सरकारया नीति मल्यूगु व नगरपालिकायात जानकारी मब्यूसे राहत वितरण याःगु नं वयकःया धापू दु ।
नगरपालिकां आःतक्क ५१ लख तका ज्वलिंज्वःया राहत इनेधुंकूगु दुसा पूर्व निर्धारित कीर्तिपुर महोत्सवया लागिं फ्याःगु १ करोड तका नं विपद् कोषय् तयागु प्रमुख महर्जनं जानकारी बियादिल । नगरपालिकां थ्व हे बैशाख १६ गतेनिसें न्यान्हुतक्क महोत्सव यायेगु धकाः वंगु माघय् निर्णय याःगु खः ।
‘राहतया लागिं संघीय सरकारया जक ख्वाः मस्वःसे नगरपालिकाया स्रोतसाधनं फत्तले ज्या याये । संघीय सरकारं धेबा ब्यूसा ला बां हे लाइ । मब्यूसां नगरपालिकां राहतया लागिं थप ज्या न्ह्यःने यंके’ प्रमुख महर्जनं धयादिल ।
वाग्मती प्रदेश सरकारं राहत वितरणया लागिं नगरपालिकायात १२ लख तका ब्यूगु खः । येँ महानगरपालिकां आःतक्क राहत वितरणया ज्या न्ह्याकातःगु दुसा निगूगु चरणया राहत इनेगु निर्णय मेगु नगरपालिकां मयाःनि ।
लकडाउन ताःहाकयावंलिसें राहतया माग याइगु परिवारया ल्याः नं अप्वया वनाच्वंगु दु ।
Categorized in राष्ट्रिय