किपू व चीनया ह्वाङकाङ्ग शहर दथुइ भगिनी सम्बन्ध
नृपेन्द्रलाल श्रेष्ठ | अनलाथ्व चतुर्दशी ११४०,असोज १४ बुधवाः
![](https://www.lahananews.com/sites/default/files/kipu_9.jpg)
मित्रराष्ट्र चीनया हुबही प्रान्तया ह्वाङकाङ्ग शहर व किपू नगरपालिका दथुइ भगिनी सम्बन्ध कायम जुइ त्यःगु दु । किपू व चीनया ह्वाङकाङ्ग शहर दथुइ साँस्कृतिक, शैक्षिक, पर्यटक आदान प्रदान नाप स्वास्थ्य व आर्थिक विकासया लागि ग्वहालि यायेगु उद्देश्यं उगु सम्बन्ध कायम जुइ त्यःगु खः।
थुकिया लागि असोज ९ गते अनलाइनपाखे न्हापागु पटक सहलह ज्याझवः जुगु खः। उगु सहलह ज्याझ्वलय् किपू नगरपालिकाया मेयर रमेश महर्जन व ह्वाङकाङ्ग शहरया उप–प्रमुख डक बोले भगिनी सम्बन्ध कायम यायेगु समझदारी पत्रय् हस्ताक्षर यानादिगु खः ।
किपू नगरपालिकाया न्हुगु भवन, अमल्सिय् जुगु अनलाइन सहलहय् समझदारी पत्रय् ल्हाःचिं तःगु निगु पक्षय् स्क्रिनय् क्यःगु खः ।
उगु ज्याझ्वलय् किपू नगरपालिकाया मेयर महर्जनं थुगु सम्बन्धं किपू लगायत नेपालया हे पर्यटनया नाप आर्थिक विकासय् ग्वाहालि जुइ धका भलसा कयादिगु दु।
स्टुडेण्ट एशोसियसन अफ बेल्ट एण्ड रोड इनिसियसन (सब्रि) विद्यार्थी सङ्गठन न निगु शहरया दथुइ सम्बन्ध विस्तार यायेगु सम्पर्कय् ग्वाहालि याइगु सब्रिका कन्ट्री डाइरेक्टर प्रविण महर्जन न धयादिगु दु ।
ज्याझ्वलय् किपू नगरपालिकापाखे आमन्त्रित सूचना प्रविधि विज्ञ ईन्जिनियर अनन्तमान सिंह न किपूया साँस्कृतिक व पर्यटन थासय् ऐतिहासिक महत्वया बारय् चीनियाँ पक्षयात जानकारी बियादिगु खः।
Categorized in राष्ट्रिय