किपूलि तःजिक सत्यमोहनयात सम्मान याइगु
नृपेन्द्रलाल श्रेष्ठ | तछलाथ्व द्धादशी ११३९ (जुन १४ २०१९)
![](https://www.lahananews.com/sites/default/files/satay.jpg)
अनक मिडिया, नेवाः एफएमया संयोजनय किपूया जनसमुदायपाखें कन्हय् जेष्ठ ३२ गते शनिवाः शताब्दी पुरुष सत्यमोहन जोशीयात तःजिक नागरिक अभिनन्दन ज्याझ्वः याये त्यःगु दु ।
उगु शताब्दी पुरुष नागरिक अभिनन्दनयात गुथि विधेयक विरुद्धया आन्दोलनया रुपं न्ह्यज्याकेगु जुइ धकाः शताब्दी पुरुष नागरिक अभिनन्दनयात कयाः प्रचारात्मक ज्याझ्वःया रुपं जूगु पत्रकार सम्मेलनय् न्ह्यथंगु दु ।
उगु पत्रकार सम्मेलनय् अनक मिडियाया प्रमुख कजि श्रीराम महर्जन, म्यानेजिङ्ग डिरेक्टरलिसें नेवाः एफएमया प्रमुख नविन महर्जन, नेवाः एफएमया स्टेशन म्यानेजर श्रीकृष्ण महर्जन व किपू नगरपालिका ९ वडाया वडाध्यक्ष गंगाराम महर्जनपिन्सं शताब्दी पुरुष सत्यमोहन जोशीयात नागरिक अभिनन्दन यायेमाःगु विषयलय् खँ कनादिगु खः ।
वाङमय शताब्दी पुरुष सत्यमोहन जोशीयात जेष्ठ ३२ गते शनिवाः सुथय् ८ ता इलय् उगु हे बाघभैरव ब्यांक्वेटया हलय् तःजिक नागरिक अभिनन्दन याये त्यःगु खः ।
उगु ज्याझ्वलय् बाँसुरी खलः, धाःबाजा खलःलिसें सकतां मिसा पुचः, मां पुचः, थीथी संघसंस्था जानाः मंकाः कथं सत्यमोहन हना खलः ११३९ नीस्वनाः उकथं वाङमय् शताब्दी पुरुष जोशीया तःजिक नागरिक सम्मान यायेत्यंगु खः ।