काष्ठमण्डप बैशाख १२ गते दशशउलेज्या यायेगु तयारी
नृपेन्द्रलाल श्रेष्ठ | कौलागा षष्ठी ११४०,कार्तिक २१ शुक्रवाः
येँया एतिहासिक काष्ठमण्डप बैशाख १२ गते उलेज्या यायेगु तयारी यानाच्वंगु दु। २०७२ साल बैशाख १२ गतेया तःभुखाचं क्षतिग्रस्त जूगु काष्ठमण्डप उगु हे दिं वइगु बैसाख १२ गते उलेज्या यायेगु तयारी दु धका थौं परराष्ट्रमन्त्री प्रदीप ज्ञवालीं काष्ठमण्डप निरिक्षिण यायेगु झ्वलय् अथे धयादिगु खः।
थौं परराष्ट्रमन्त्री प्रदीप ज्ञवालीं व शहरी विकासमन्त्री कृष्णगोपाल श्रेष्ठं काष्ठमण्डप पुननिर्माणया प्रगति बारे जानकारी कायेत काष्ठमण्डप झायादिगु खः।
काष्ठमण्डप पुनःनिर्माणया अवस्थाबारे जानकारी कायेगु कथं परराष्ट्रमन्त्री ज्ञवालीं आःतकया प्रगति खुलेजुया प्रशंसा यानादिगु दु। ‘काष्ठमण्डपया पुननिर्माण अवस्था खनेदया स्थानीय जनता सहितयो सहभगितां सम्पदा निर्माण छगू नमुना स्थापित जुगु दुु धका धयादिगु खः।
मौलिक परम्परायात ल्यका याकन हे ज्या जूगु खना सरकारया पाखे जि सुभाय् बिइ हे माः, थज्यागु यस्ता सम्पदा पुननिर्माणय् स्थानीय जनताया सहभागिता मुख्य देन खः धका वयकलं धयादिगु खः।
शहरी विकासमन्त्री कृष्णगोपाल श्रेष्ठं काष्ठमण्डप क्षतिग्रस्त जूगु दिं आः वइगु बैशाख १२ गते १२ बजे हे उलेज्या यायेगु धका धयादिगु खः।
स्थानीयपि नाप सहभागिताय् काष्ठमण्डप पुननिर्माण समिति मार्फत पुनःनिर्माण यायेगु शुरु निसे कुतःजुया वयाच्वंगु धका धयादिसे मन्त्री श्रेष्ठं आःतक खनेदुगु प्रगति खना लय्तायादिगु दु। वयकलं हनुमानढोका दरबारक्षेत्र लगायत देय्या महत्वपुर्ण सम्पदा पुनःनिर्माण याये वलय् स्थानीययात सहभागिता याकेमाः धाःसे काष्ठमण्डप पुननिर्माण समितिं याःगु ज्याया प्रशंसा यासे क्वछिगु इलय् हे सम्पन्न यायेगु मुख्य दायित्व खः धका धयादिसे। वयकलं झीसं मिति घोषणा याये धुकागु दु उगु हे इलय् तयार यायेत इनाप यानादिगु खः।
काष्ठमण्डप पुननिर्माण समितियाा संयोजक नाप वागमती प्रदेश सांसद राजेश शाक्यं छु प्राविधिक समस्या वःसा क्वछिनागु हे इलय् पुननिर्माण सम्पन्न याना हे त्वतेयेगु धका प्रतिबद्धता क्यानादिगु खः। संयोजक शाक्यं झीसं एतिहासिक जिम्मेवारी काये खःगु दु धका धयादिसे उकि पुरा यायेगु न झीगु मुख्य कर्तब्य खः धका धयादिगु खः।
![](https://www.lahananews.com/sites/default/files/pictures/bb.jpg)
वयकया कथं काष्ठमण्डप पुननिर्माण सम्पन्न यायेत करिब १३ करोड रुपिया लगे जुइगु। सरकारया पाखे पुननिर्माण याये वलय् करिब १९करोड रुपिया अनुमान यानागु धका धयादिगु खः। येँ महानगरपालिकां पुर्ण आर्थिक ग्वाहालि पुननिर्माण जुया वयाच्वंगु थुगु सम्पदाया लागि महानगरपालिकां करिब साढे १० करोड रुपिया उपलब्ध याये धुकुगु दु।
पुननिर्माणय् प्रयोग जुगु प्रविधिबारे जानकारी बियादिसे संयोजक नाप प्रदेश सांसद शाक्यं जिमिसं सातौ शताब्दीया हे प्रविधि प्रयोग यानागु दु। चा व उगु यलय् छ्याला तःगु समाग्रीयात छ्यला पुननिर्माण यानागु खः। सातौ शताब्दीया छ्यला तःगु साइजया अप्पा हे छ्यलागु दु, समितिं अप्पा निर्मँण कम्पनीयात विशेष इनाप याना सातौ शताब्दीया साइज हे अप्पा निर्माण याकःगु धका शाक्यं धयादिगु खः।
वयकलं वइगु बैशाख तक पुननिर्माण सम्पन्न यायेगु आः तक करिब ७५ प्रतिशत ज्या क्वचाःगु दु फागुन अन्तिम तक क्वचाइ धका धयादिगु खः । थुगु समितिं २०७५ वैशाख ३१ निसे ज्या शुरु याःगु खः
मन्त्रीपि काष्ठमण्डप पुननिर्माण अवलोकन लिपा हनुमानध्वाकाया नासःचोक, कालीदमन चोक, मुलचोक, मोहनकाली चोक, तलेजुया न अवलोकन यानादिगु खः।