कार्तिक प्याखं क्वचाल
शोभा श्रेष्ठ | कछलाथ्व चतुर्दशी ११४१, मंसिर १४ आइतवाः
![](https://www.lahananews.com/sites/default/files/kka.jpg)
दँय् दँस कार्तिक शुक्लपक्ष त्रयोदशी तिथि निसे क्यने वयाच्वंगु कार्तिक प्याखं नृसिंह अवतार नृत्य मञ्चन यासे म्हिगः थुगु दँया ‘कार्तिक प्याखं ’ क्वचाःगु दु।
न्हापागु दँय् झीनिन्हु क्यना वयाच्वंगु खःसा थुगु दँय् विश्वव्यापी कोरोना महामारीया कारण थुगुसी शुक्रवाः व शनिवाः निन्हु क्यना क्वचाकूगु खः। विष्णुपुराणया आधारित बाखं कथं हिरण्यकशपुया बध यायेत अप्सरापिन्स नृसिंहया तं शान्त्त याःगु।
![](https://www.lahananews.com/sites/default/files/pictures/kart.jpg)
वया लिपा नृसिंहया पूजा यासे नृत्य समापन याःगु खः। अथेहे वःगु शुक्रवाः वराह नृत्य प्रदर्शन याःगु खः। कार्तिक नाच संरक्षणया लागि थुगु दँय् निसे अक्षयकोष स्थापना याःगु खः।
थुगु ऐतिहासिक नाप सांस्कृतिक सम्पदायात उचित संरक्षण व प्रवद्र्धन यायेत विसं २०७० निसे निन्हु थप यासे झीन्हु व वया लिपा मेगु निन्हु थप यासे झीनिन्हु क्यना वयाच्वंगु खः।
राजा श्रीनिवासया काय् योगनरेन्द्र मल्लं ‘उषाहरण’ व ‘माधवानल’ निगु लीला थपे याना कार्तिक ज्वःछि २७ दिं सञ्चालन याःगु खः। उकि १७ विधाया बाखं व नृत्य प्रदर्शन याइगु खः।
थुगु पटक १८ दँया मस्त व ६० दँया वृद्धपिन्त कोरोनाया अप्वो जुइ फुगुलि कलाकारया रुपय् छनोट मया।
![](https://www.lahananews.com/sites/default/files/pictures/karti.jpg)