न्हूदँ राष्ट्रिय समारोह समितिं न्हूदँ ने.सं. ११४१ थुगु दँय् कोरोना संक्रमणया कारणं बसन्तपुरय् दँय् दसं जुयाच्वंगु भिंतुना सभा व जुलुस स्थगित याःगु दु।

न्हुदँ पारु कन्हये सामाजिक दूरी कायम यासें सुथसिया ९ः३० ताः इलय् येँया राष्ट्रिय सभागृहय् भिंतुना सभा याइगु जूगु दु। समारोह समितिं ब्यूगु जानकारी कथं कन्हय्या ज्याझ्वलय् सदां थें प्रधानमन्त्रीयात मूपाहाँ कथं ब्वनातःगु दुसा पाहाँ कथं न्हूदँ समारोह समितिया सल्लाहकारपिं व प्रतिष्ठित व्यक्तित्वपिन्त ब्वनातःगु दु ।

उगु सभाय् येँया सांसदपिं, प्रदेशसभाया सांसदपिं, मेयर उपमेयर, वडाध्यक्ष, नेवाः आन्दोलनया सक्रिय व्यक्तित्वपिं, न्हूदँ समारोह समितिया सल्लाहकारपिं, मूल समारोह समितिया दुजःपिं, पत्रकारपिंलिसें विशिष्ट व्यक्तिपिन्त ब्वनातःगु दु । कन्हय्या ज्याझ्वलय् दकले न्हापां नेपाःया राष्ट्रिय म्ये, नेवाःतय्गु मंकाः म्ये, जनकवि दुर्गालाल श्रेष्ठं च्वयादीगु न्हूदँया भिंतुना म्ये हायेकाः लसकुस यायेत्यंगु दुसा मूपाहाँपाखें न्हूदँया लसताय् त्वाःदेवा च्याकाः न्हूगु दँयात लसकुस यायेगु ज्याझ्वः तयातःगु दु ।

अथेहे, न्हूदँया सांस्कृतिक जुलुस स्थगित जूगु हुनिं यानाः कन्हय् भिंतुना सभाय् नेवाःतय्गु स्वथ्वः सांस्कृतिक बाजं थ्वयेकेगु ज्याझ्वः तयातःगु दु । अथेहे, न्हूदँ समारोह समितिं दँय् दसं पिथनाच्वंगु तिथि पौ मूपाहाँपाखें सार्वजनिक यायेगु ज्याझ्वः तयातःगु दु । उगु ज्याझ्वः हलिंन्यंकं च्वनाच्वंपिं दथुइ थ्यंकेगु नितिं टेलिभिजन, एफएम, यूट्युब, अनलाइनपाखें प्रत्यक्ष प्रसारण यायेत्यंगु दु।

Categorized in राष्ट्रिय