ओली हे न्हापांम्ह राष्ट्रघाती’ – श्रेष्ठ
लहनान्यूज सम्वाददाता | कछलागा षष्ठी ११३७ (नोभम्बर २० २०१६)
![](https://www.lahananews.com/sites/default/files/rajen_0.jpg)
संघीय समाजवादी फोरम नेपालया ल्यूनायः राजेन्द्र श्रेष्ठंं संविधान संशोधनया विषय राष्ट्रघाती विदेशी एजेन्डा खःसा नेकपा एमालेया नायः केपी ओली हे दक्कले न्हापांम्ह राष्ट्रघाती खःगु धयादीगु दु ।
सङ्घीय समाजवादी फोरम, नेपाल यल जिल्लाया पुनर्गठन ज्याझ्वलय् ल्यू नायः श्रेष्ठं संविधान संशोधनया विषय धइगु विदेशी एजेन्डा खःगु केपी ओलीया धापूयात किकाः संविधानया न्हापांगु संशोधन याःम्ह केपी ओली न्हापांम्ह राष्ट्रघाती जूगु धयादीगु खः ।
श्रेष्ठं पुलांगु बिचाः ज्वनाः न्हूगु राजनीतिक शक्ति दयेकेफइमखु धासें उकिया लागिं बिचाः, सङ्गठन, सङ्घर्ष व कार्य पद्धति हरेक ख्यलय् थःगु बिस्कं विकल्प दयेमाःगु धयादिल । आःया राज्य पुनर्संरचनाय् विवादया विषय सङ्घीयतायात संरचनाया रूपं जक स्वयेगु खः कि सिद्धान्त वा वादया रूपं स्वयेगु धइगु खःगु श्रेष्ठं स्पष्ट यानादिल ।
थौंया ज्याझ्वलय् कृष्णभक्त डंगोलया अध्यक्षताय् सङ्घीय समाजवादी फोरम, नेपाल यल जिल्लाया पुनर्गठन जूगु खः । ज्याझ्वलय् यल जिल्ला इन्चार्ज न्हुच्छेलाल महर्जनं ३१ दुजःया जिल्ला तदर्थ समितिया घोषणा यानादिल ।
ज्याझ्वलय् पार्टीया केन्द्रीय दुजः अले नेवाः प्रदेश इञ्चार्ज कृष्ण वहादुर घःजु अले केन्द्रीय दुजः पुष्पराज राजकर्णिकारं यलया पार्टीया ज्यायात व्यवस्थित यायेत व पहिचानया मुद्दायात स्थापित यायेत समितिं नेतृत्वदायी भूमिका म्हितेमाःगु धयादिल । पार्टी न्वकू राम वहादुर स्याङ्ताङं लसकुस यानाद्यूगु ज्याझ्वलय् पार्टी केन्द्रीय दुजः लिला सिटौला, ताम्सालिङ प्रदेश समितिया न्वकू आशमान तामाङ, नेवाः प्रदेश समितिया छ्यान्जे चन्द्र महर्जन लिसेंया नेतातयगु उपस्थिति दुगु खः।
Categorized in राजनीति