ओलम्पिक कासा थौंनिसें जापानया टोकियोय् औपचारिक रुपं न्ह्यात
दिल्लाथ्व चतुर्दशी ११४१,साउन ८ शुक्रवाः
![](https://www.lahananews.com/sites/default/files/2017-06-09-tokyo2020-thumbnail.jpg)
विश्व खेलकुदया दक्वःलय् तःधंगु उत्सव ओलम्पिक कासा थौंनिसें जापानया टोकियोय् औपचारिक रुपं न्ह्यानाच्वंगुदु ।
विश्व खेलकुदया कुम्भमेला नालातःगु गृष्मकालीन ओलम्पिकया ३२क्वःगु संस्करण क्वजिनातःगु मितिसिवें दच्छि लिबाक्क जुइत्यंगु खः । कोरोना महामारीं थगुने जुइ मफूगु थुगु ओलम्पिकया नाँ धाःसा ‘टोकियो ओलम्पिक २०२०’ हे तःगु दु ।
ओलम्पिकया छुं कासात निन्हू न्ह्यः हे न्ह्यायेधुंकुगु दु । तर औपचारिक उलेज्या धाःसा नेपाली ई कथं थौं सनिलय ४ ता ई जुया ४५ गू मिनेटय् न्ह्यायेत्यंगु दु । ओलम्पिक स्टेडियमय् जुइगु उलेज्या समारोहस नेपाःया ध्वाँय् पौडी कासामि गौरिका सिहंं क्वबुइगु जूगु दु ।
नेपाःया पौडीया सिंहलिसें एलेक्जेण्डर शाह, एथलेटिक्सया सरस्वती चौधरी, सुटिङया कल्पना परियार व जुडोकी सोनिया भट्टं धेंधेंबल्ला याइ । गौरिकां मिसा सच्छि मिटर फ्रि स्टाइल व एलेक्जेन्डरं मिजं सच्छि मिटर फ्रि स्टाइलय् धेंधेंबल्ला याइ ।
सुटिङया कल्पनां मिसा १०गू मिटर एयर राइफल, जुडोया सोनियां मिसा ४८गू केजी ग्यसु पुचः व एथ्लेटिक्सया सरस्वतीं मिसा सच्छि मिटर ब्वाज्या कासाय् धेंधेंबल्ला याइ ।
ओलम्पिकय् ब्वति कायेत हलिंया २ सः व ४गू देय् व क्षेत्रपाखें ११द्वः व २ सः सिवें आपाः कासामि टोकिया थ्यंगु दु ।
Categorized in कासा