ऐतिहासिक नीलबाराही द्यः प्याखँ क्वचाल
मनोज भण्डारी, बोडे | गुंलागा पंचमी ११४१, भाद्र ११ शुक्रवाः
दँय्दसंया सापारुया कन्हेखुन्हूनिसें स्वन्हूतक्क न्ह्याइगु प्रसिद्ध नीलबाराही द्यः प्याखँ शुक्रबाः क्वचाल । उगु द्यः प्याखँ थिमी नगरपालिकाया बोडे प्यन्हू दिं प्यन्हू चाः तक्क न्ह्याःगु खः ।
थुकियात बोडेया मे प्वाः खनेगु व विस्का जात्रालिपाया तःधंगु नखःया कथं न काइगु याई । विशेषकथं थ्व द्यः प्याखनय् भैरव, प्यम्ह नीलबाराही, प्यम्ह कुमारी, प्यम्ह सिंह, द्वारपाल, क्षेत्रपाल व प्यम्ह गणेशयाना मुक्कं १९गुम्ह देवगणपिनिगु प्याखँ ल्हूकेगु यानावयाच्वंगु दु ।
द्यः प्याखँया नितिं तःक्व पुचःया बाजं थाइपिनिगु नं ब्वति दइगु या । उकि मध्ये मू बाजंया कथं कोताः बाजं खः । थ्व बाजं मेमेगु बाजंसिबें फरक किसिमया जुई । गुगु बाजं जात्रा न्ह्याना क्वमचातले बिर्सजन यायेमज्यूगु धापू दु ।
थ्व प्याखँया न्हियान्हिथं द्यः छेँय् पिथना थीथी त्वाःया देवालय् त परिक्रमा याना हाकनं द्यः छेँ लिहाँवया विर्सजन जुई । नाचया झ्वलय् देवगणपिं उपवासय् च्वनिसा सुयागु लिसे नं न्ववाइ मखु अले गनं नं फ्यतुइ मखु । थाय् थासय् प्याखँ ल्हुकिगू ईलय् थीथी थासं वःपिं तधंगु ल्याखय् भक्तजनपिन्सं पूज्याइगु याई ।
मल्लकालिन ईलय् मध्यपुर थिमिइ भूतप्रेत, पिशाचलगायत दानवरुपी आत्मापिन्सं दुःख, कष्ट बिउगुलिं सापारुया कन्हेखुन्हू उपिं पिशाचया कष्टं मुक्त जुइत थ्वः नीलबराही प्याखँ ल्हूकेगु याःगु स्थानीय पिनिगु धापू दु ।
