एफ एमपाखें हलिमय् नेवाः प्रतिभा न्ह्यब्वयेगु अभियान न्ह्यातः
लहनान्यूज | ने. सं. ११३८ कछलागा सप्तमि (नोभेम्वर १०, २०१७), किपू
![](https://www.lahananews.com/sites/default/files/23319037_1651843324867987_7535563089238401504_n.png)
नेवाःतय्गु वस्ती वस्तीइ वना स्थानीयवासीया प्रतिभा न्ह्यब्वयेगु आज्जु ज्वना नेवाः एफ.एम. १०६ फुति ६ पाखें अभियानया सुभारम्भ जूगु दु ।
शनिवाः ने.सं. ११३८ कछलागा अष्टमी (कार्तिक २५ गते) न्हिनय् ११ बजेनिसें न्हिनसिया २ ता ईतक नेवाः एफ. एमया संयोजनय् जूइगु थुगु अभियानया प्रत्यक्ष प्रशारण हलिं न्यंकं च्वनाच्वंपिं नेपाःमिपिन्सं इन्टरनेटया माध्यमं newafm.com.np पाखें न्यने फइगु जूगु दु ।
अभियानया सुभारम्भ स्वनिगलय् दक्ले न्हापां वस्ती जूगु किपूस्थित थक्वाःया झ्यालं फल्चा लागाय् हलिं नेवाः गुथि थक्वाः कचा, हलिं नेवाः गुथि सोनितपुर कचा, हलिं नेवाः गुथि थानकोट कचा व श्री आदिनारायण भजन मण्डल थक्वाःया ग्वसालय् जूइत्यंगु खः । न्हापाँगु प्रत्यक्ष प्रसारणय् थक्वाःया साहित्यकारपिंपाखें साहित्य पाठ, कलाकरपिंपाखें सांस्कृतिक प्रस्तूति व स्थानीयविज्ञपाखें थक्वःया ऐतिहासिक पक्षनिसें अनया समस्या न्ह्यब्वयेगु ज्याः जुइगु जूगु दु ।
अभियानयात लय् लय् पतिकं लिपांगु शनिवाः नेवाः वस्ती वस्तीइ वना निरन्तरता बिइगु नेवाः एफ.एम. १०६ फुति ६ पाखें जानकारी ब्यूगु दु ।
Categorized in राष्ट्रिय