इंग्लीश प्रिमियर लिग फुटबलय् लिभरपुल, चेल्सी व म्यान्चेस्टर सिटी त्यात
कछलागा द्धादशी ११४२, मंसीर १६ बिहीबाः
![](https://www.lahananews.com/sites/default/files/chelsea_3.jpg)
इंग्लीश प्रिमियर लिग फुटबलय् शिर्ष क्लबत चेल्सी, लिभरपुल व म्यान्चेस्टर सिटी त्याःगु दु ।
शिर्ष थाय्या चेल्सीं वाट्फोर्डयात २–१ गोलं बुकाबिल । चेल्सीया लागिं मेसन माउन्ट व हकिम जियचं १, १ गोल याःबलय् वाट्फोर्डया इम्यानुएल डेनिसं न्हापांगु गोल याःगु खः ।
वंगु चान्हय् जूगु मेगु कासाय् म्यान्चेस्टर सिटीं एस्टन भिल्लायात २–१ गोलं बुकाबिल । उकिया लागिं रुबेन डियास व बर्नार्डो सिल्भां १, १ गोल यात । भिल्लाया डग्लस लुइजं १ गोल लितबिल ।
उपाधि दावेदार लिभरपुलं वंगु चान्हय् एभर्टनयात ४–१ गोलं ल्यूने लाकाबिल । मर्सीसाइड डर्बी कासाय् लिभरपुलयात त्याकाबीत मोहोमद सालाहं २ गोल याःबलय् जोर्डन हेन्डर्सन प डिएगो योटां १, १ गोल तनाबिल । एभर्टनया डेमाराई ग्रें १ गोल लितबिल ।
प्रिमियर लिगया हे मेगु कासाय् साउथह्याम्पटन व लेष्टर सिटीं २–२ गोलया ज्वलिंज्वः म्हितूबलय् वेष्टह्याम युनाइटेड व ब्राइटनं १–१ गोलया अले वुल्भरह्याम्पटन वान्डरर्स व बन्र्लें गोल मजूगु ज्वलिंज्वः म्हितूगु दु ।
वंगु चान्हय्या कासात धुंकाः लिग धलखय् १४ कासां ३३ ल्याः मुंकूगु चेल्सी शिर्ष थासय् दु । उलि हे कासा म्हिताः ३२ ल्याः मुंकूगु म्यान्चेस्टर सिटी निगूगु थासय् लाःबलय् स्वंगूगु थाय्या लिभरपुलया ३१ ल्याः दु ।
Categorized in कासा