इंग्लीश प्रिमियर लिगय् म्यान्चेस्टर सिटी, लिभरपुल व चेल्सी त्यात
थिंला नवमी ११४२, मंसीर २६ आईतवाः
![](https://www.lahananews.com/sites/default/files/city_4.jpg)
इंग्लीश प्रिमियर लिग फुटबलय् वंगु शीर्ष क्लबत म्यान्चेस्टर सिटी, लिभरपुल, चेल्सी, म्यान्चेस्टर युनाइटेड व आर्सनल त्यागु दु ।
शिर्ष थाय्या म्यान्चेस्टर सिटीं वुल्भरह्याम्पटन वान्डरर्सयात १गू–०या गोल अन्तरं बुकुगु दु । सिटी त्यागुलिइ राहिम स्टर्लीङं ६६गूगु मिनेटय् पेनाल्टीमार्फत निर्णायक गोल याःगु खः ।
वंगु चान्हय्सिया मेगु कासाय् मोहोमद सालाहं पेनाल्टी मार्फत निर्णायक गोल यायेधुंका लिभरपुलं एस्टन भिल्लायात १गू–०या गोल अन्तरं बुकल । थुगु हे कासा मार्फत लिभरपुलया पूर्व कासामि स्टेभेन जेरार्डं एस्टन भिल्लाया प्रशिक्षकया रुपय् डेब्यु याःगु दु ।
प्रिमियर लिगया हे मेगु कासाय् चेल्सीं लिड्स युनाइटेडयात ३गू–२गूया गोल अन्तरं बुकुगु दु । चेल्सीया नितिं जर्गीनों पेनाल्टीमार्फत निगू गोल याःबलय् मेसन माउन्टं छगू गोल थप याःगु खः ।
लिड्स युनाइटेडया राफिन्हा व गेल्हार्टं छगू छगू गोल याःगु खः । अथेहे म्यान्चेस्टर युनाइटेडं नरिच सिटीयात १गू–०या गोल अन्तरं बुकुबलय् आर्सनलं साउथह्याम्पटनयात ३गू–० या गोल अन्तरं बुकुगु दु ।
वंगु चान्हय्सिया कासालिपा प्रिमियर लिगया ल्याः धलःखय् १६गू कासां ३८गू ल्याः मुंकुगु म्यान्चेस्टर सिटी शिर्ष थासय् दु । निगूगु थाय्या लिभरपुलया ३७गू ल्याः जूगु दुसा ३६ गू ल्याः लिसें चेल्सी ३गूगु थासय् दु ।
२७गू–२७गू ल्याः मुंकुगु वेष्ट ह्याम यु्नाइटेड व म्यान्चेस्टर युनाइटेड छसिकथं ४गूगु व ५गूगु थासय् दु । २६गू ल्याः लिसें आर्सनल ६गूगु थासय् दु ।
Categorized in कासा