इंग्लीश प्रिमियर लिगय् चेल्सी, म्यान्चेस्टर सिटी व लिभरपुल त्यात
कौलाथ्व द्वादशी, ११४१, आइतबाः
![](https://www.lahananews.com/sites/default/files/chelsea_2.jpg)
इंग्लीश प्रिमियर लिग फुटबलय् वंगु चान्हय् चेल्सी, म्यान्चेस्टर सिटी, लिभरपुल व लेष्टर सिटी त्याःगु दु ।
धलःया दकले न्ह्यःनय् दुगु चेल्सीं ब्रेन्टुफोर्डयात १–० गोलं बुकूगु खः । चेल्सीं कासा त्याकूबलय् बेन चिलवेलया गोल निर्णायक जूगु खः । मेगु दाबेदार पुचः लिभरपुलं वंगु चान्हय् वाट्फोर्डयात ५–० गोलं बुकूगु दु ।
लिभरपुलया नितिं रोबर्टो फर्मिनों ह्याट्रिक याःबलय् सादियो माने व मोहोमद सालाहं छगोल–छगोल थप यानाब्यूगु दु । वंगु चान्हय् जूगु मेगु कासाय् म्यान्चेस्टर सिटीं बर्न्लेयात २–० गोलं बुकूगु दु ।
सिटीं कासा त्याकूबलय् केभिन डे ब्रायन व बर्नार्डो सिल्भां छगोल–छगोल याःगु दु । म्यान्चेस्टर युनाइटेडयात वंगु चान्हय् लेष्टर सिटीं ४–२ गोलं बुकूगु दु । प्रिमियर लिगया मेमेगु कासाय् एस्टन भिल्लायात वुल्भरह्याम्पटन वान्डरर्सं ३–२गू गोल अन्तरं बुकूबलय् साउथह्याम्प्टनं लिड्स युनाइटेडयात १–० गोलं बुकूगु दु ।
वंगु चान्हय्या कासालिपा प्रिमियर लिगया ल्या धलखय् ८गू कासापाखें १९गू ल्या दयेकूगु चेल्सी दकले न्ह्यःनय् दु । ज्वःलाक्क कासा म्हिताः १८गू ल्या दयेकूगु लिभरपुल निगूगु थासय् दुसा १७गू ल्यानाप म्यान्चेस्टर सिटी स्वंगूगु थासय् दु ।
Categorized in कासा