असनय् प्यचाःप्यांग्राया सवारीयात कया सहलह
नृपेन्द्रलाल श्रेष्ठ | सिल्लाथ्व पुन्हि ११३८ (जनवरी ३१ २०१८)
![](https://www.lahananews.com/sites/default/files/asan.jpg)
वंगु माघ २ गते निसें असनय् प्यचाःप्यांग्राया सवारी साधन निषेध यानाः ब्वलंगु समस्याया कया थौं असंया दुगंबहालय् छगू ज्याझ्वः जुगु दु । असं लागाय् च्वंगु झिंनिगू संस्थाया मंकाः ग्वसालय् जूग थुगुु ज्याझ्वलय् असनय् गाडी निषेधं ब्वलंगु समस्याया समाधान यायेत मंकाः सः या ज्याझ्वः जुगु ख ।
उगु ज्याझ्वलय् न्ववायेगु झ्वलय् असं लागाय् असनय् प्यचाःप्यांग्राया सवारी साधन निषेध जक समस्याया समाधान मखु धासें बँपसः चीकेमाःगु, पसःक्वः पिकयाः लँ अतिक्रमण जुयाच्वंगु दिकेमाःगु, पार्किङ्गया व्यवस्थापन जुइमाःगु खँ न्ह्य थःगु खः ।
उगु ज्याझ्वलय् थःगु खँ तयेगु झ्वलय् महानगरीय ट्राफिक प्रहरी महाशाखाया सहप्रवक्ता डीएसपी मुकुन्द मरासिनीं स्थानीय पिन्त समस्या वयेकेत थज्यागु ज्यायानगु मखु धयादीसें स्थानीय जनप्रतिनिधि नाप सहलह याना हे जक थुगु पला ल्ह्वनागु खः धयादील ।
ह्याउँ निभाः पुचःया अनुप सिं सुवालं न्ह्याकादीगु थुगु ज्याझ्वलय् येँ महानगरपालिका वडा न.२२ या वडा अधक्ष्य चिनीकाजी महर्जन न थःगु नुँगः खँ तयादीगु खः ।
![](http://www.lahananews.com/sites/default/files/pictures/ason1.jpg)
थुगु ज्याझ्वः असन कमलाछी टोल सुधार समिति, असन त्यौड कुसुमबियालाक्षी टोल सुधार समिति, असन सेवा समिति, इन्द्रचोक क्लब, बालकुमारी खेल मण्डल, नरसिंह टोल सुधार समिति, भोताहिति बजार समिति, भोटाहिटी सेवा समाज, मछिन्द्र क्लब, लूनिभाः स्वास्थ्य केन्द्र इनबहाः व ह्याउँनिभाः पुचलं न्यागु बुदाया सरोकार व समस्या न्ह्यब्बगु खः ।
१. सवारी वयेवने दिकेवं हे स्थानीय ब्यापारीतय् न्हिथंया लजगा ज्याय् बनेज्यायेत माःगु सामान ल्ह्ययेत, मस्त ब्वनेकुथि वयेवनेत, अशक्त बुढाबुढीत जुइत तच्वकं थाकुया च्वंगु दु । थुकिया हुनिखं परम्परागत बजाः हे बिस्थापन जुइगु खतरा ब्वलंगु दु ।
२. लँय् ट्राफिक समस्याया मूहुनिं बँपसः हे खः । छुं नं सरकारी निकायसं दर्ता मदूगु, करया दायरां पिनेया बँपसः चिइकेगु पलेसा मानवीय जीवन लिसे तप्यंक हे स्वापू दुगु सवारी साधन हे बन्द याःगु ज्या थुइके थाकुया च्वंगु दु ।
३. स्थानीय बञ्जाःमिपिंसं पसःक्वः पिकानाः लँ अतिक्रमण यानाच्वंगुलिं नं लँय् जुइत थाकुयाच्वंगु दु ।
४. पार्किंगया माःकथं ब्यवस्थापन मजुयाः लँ अस्तब्यस्त जुयाच्वंगु दु ।
५. लँ ब्यवस्थापन प्रत्यक्ष स्थानीय जनतालिसे स्वानाच्वंगु खँ जूगुलिं छुं नं न्हूगु नियम ब्यवस्थापन यायेत स्थानीय जनतां लिसे दुग्यंक सहलह ब्याकाः सहमति कायेमाःगु खः ।