अष्ट्रिया व डेनमार्क युरोकप फुटबलया नक आउट चरणय्
बछलाथ्वः द्वादशी ११४१, असार ८ गते मंगलबाः
![](https://www.lahananews.com/sites/default/files/aus_5.jpg)
अष्ट्रिया व डेनमार्क युरोकप फुटबलया नक आउट चरणय् थ्यंगु दु । वंगु चान्हय् जूगु कासाय् यु्क्रेनयात १–०या गोल अन्तरं बुका अष्ट्रिया राउण्ड अफ सिक्सटिनय् थ्यंगु खः ।
पुचः ‘सी’ लय् ३ गू कासापाखें ६ गू ल्याः मुना ल्यु त्याकुमि जुया अष्ट्रियां मेगु चरणय् थाय् पक्का याःबलय् ३गू ल्याः नापं ३गूगु थासय् दूगु युक्रेनं मेगु पुचःया लिच्वः पिइमाःगु दु । थ्वयान्ह्यः हे राउण्ड अफ सिक्सटिनय् थ्यनेधुंकुगु नेदरल्याण्ड्स ९ गू ल्याः मुना पुचः त्याकुमि जूगु दु ।
वंगु चान्हय् जूगु कासाय् उमिसं उत्तरी मेसेडोनियायात ३–०या गोल अन्तरं बुकुगु खः । उखे पुचः ‘बी’ लय् बेल्जियम ९ गू ल्याः नापं पुचः त्याकुमि जुबलय् ३गू ल्याः मुंकुगु डेनमार्क नं नक आउट चरणय् थ्यंगु दु । वंगु चान्हय् जूगु कासाय् बेल्जियमं फिनल्याण्डयात २–०या गोल अन्तरं बुकुबलय् डेनमार्कं रुसयात ४–१या गोल अन्तरं बुकल ।
थुगु पुचःलय् निगूगु थाय्या डेनमार्क, ३गूगु थाय्या फिनल्याण्ड व ४गूगु थाय्या रुसया उतिग्यंक ३गू –३गू ल्याः जूबलय् गोल अन्तरया लिधंसाय् वरियता लिच्वःस थ्यंगु खः ।
युरोकप फुटबलय् थौं निगू कासा जुइ । पुचः ‘डी’ या कासाय् इंग्ल्याण्डं चेक रिपब्लिकलिसे म्हितिइबलय् क्रोएसिया व स्कटल्याण्ड दथुइ धेंधेंबल्ला जुइ । निगुलिं कासा चान्हय् १२ ता ई जुया ४५ गू मिनेटय् जुइ ।
थुगु पुचःया निगू कासापाखें ४गू–४गू ल्याः मुंकुगु चेक रिपब्लिक व इंग्ल्याण्ड छसिकथं न्हापांगु व निगूगु थासय् दु । १गू–१गू ल्याः मुंकुगु क्रोएसिया व स्कटल्याण्डया नं राउण्ड अफ सिक्सटिनय् थ्यनेगु सभावना ल्यंदनिइ ।
Categorized in कासा