अर्थमन्त्री जनार्दन शर्मां श्वेतपत्र न्ह्यब्वयादिल
लहानान्युज | गुंलाथ्व द्धितीया ११४१,साउन २६ मंगलवाः
तत्कालिन केपी शर्मा ओली सरकारं याःगु कमजोरी क्यना वर्तमान सरकारं देय्या आःया आर्थिक अवस्थाया यथार्थ संसदय् न्ह्यब्वःगु दु ।
अर्थमन्त्री जनार्दन शर्मां मंगलबाः प्रतिनिधिसभाया मुँज्याय् ‘देय्या वर्तमान आर्थिक अवस्थाया जानकारी’ न्ह्यब्वसें थ्वयान्ह्यया सरकारं जारी याःगु अध्यादेश बजेटयात प्रतिस्थापन यायेगु विधेयक हयेगु जानकारी बियादिल ।
जनप्रतिनिधिमूलक संस्थां विघटन याना तत्कालिन सरकारं अध्यादेशपाखें बजेट प्रस्तुत याःगु जुसां आर्थिक वर्ष २०७८÷७९ या आय व व्यय अनुमानया अध्यादेश संसदय् पेश जुइधुंकूगु दु । सत्ता गठबन्धनया साझा ज्याझ्वः वर्तमान सरकारया नीति व प्राथमिकता, जनचाहना लिसें कोभिड महामारीया कारण ब्वलंगु चुनौती तकंया सम्बोधन जुइकथं थपू यायेया नितिं याकनं हे प्रतिस्थापन विधेयक न्ह्यब्वय्गु अर्थमन्त्री जनार्दन शर्मा धयादिल ।
अर्थमन्त्री शर्मां थौं प्रतिनिधि सभाय् श्वेतपत्र न्ह्यब्वसें अर्थतन्त्रय् चुनौती अप्वःगु धलः न्ह्यब्वयादिल । अर्थमन्त्री शर्मां लिपांगु ईलय् प्रचारात्मक ढंगं जक बजेटया आकार अप्वयेकूगु कारण बजेटया विश्वासनियताय् म्हो जूगु धयादिल । सञ्चित घाटाय् थपू जुगुलिं बजेट योजना, वित्तीय उत्तरदायित्व स्रोत परिचालनय् विचलन वःगु वयेकलं धयादिल ।
राजस्व परिचालनय् दिगोपना मजूगु, दँय्दसं बजेटय् सिबें अप्वः स्रोत मदयेकं सहमति याःगु हुनिं खर्बौया भार थपू जूगु लगायतका थपू वर्तमान सरकारं सामना यायेमाःगु अर्थमन्त्री शर्मां श्वेतपत्र न्ह्यब्वयादिगु खः ।
