अफगान राष्ट्रपतिया चुनावी -यालिइ आत्मघाती हमला
लहना न्यूज | ने.सं. ११३९ ञलागा तृतिया (१७ सेप्टेम्बर, २०१९), मंगलवाः
![](https://www.lahananews.com/sites/default/files/Ghani.jpg)
अफगानिस्तानया राष्ट्रपति असरफ घानीया चुनावी -यालिइ आत्मघाती हमला जूगु दु ।
सेप्टेम्बर २८य् जुइगु चुनावय् हाकनं राष्ट्रपति जुइत उम्मेदवारी बियादीम्ह घानी थौंकन्हय् चुनावी प्रचार प्रसारय् व्यस्त जुयाच्वंगु दु ।
उत्तरी अफगानिस्तानया चरिकार सहरय् घानीं ब्वति कयाच्वंगु -यालिइ थौं मंगलबाः न्हिनय् आत्मघाती हमला जूगु खः । उगु हमलाय् लानाः २४म्ह नागरिकत सीगु दु । विष्फोटपाखें घानीयात धाःसा छुं मजूगु वय्कःया ग्वाहालिमिं न्ह्यथंगु दु ।
विष्फोटया जिम्मा आःतक सुनां नं काःगु मदुनि । तर अतिवादी पुचः तालिवानं हमला याःगु जुइफइगु अनुमान याःगु दु ।
अमेरिकालिसे वार्ताय् छुं नं प्रगति मजुइधुंकाः तालिवानं लिपांगु इलय् आत्मघाती आक्रमणयात तच्वयेकूगु दु ।
अमेरिकां १८दँ न्ह्यःनिसें अफगानिस्तानय् सेना तयातःगु दु । तालिवानलिसे वार्ता यानाः सेना लित यंकेगु अमेरिकाया तयारी खः । तर वंगु वालय् उगु वार्ता त्वाःदल ।
मनूतय्त ख्यानाः सेप्टेम्बर २८या चुनावय् ब्वति कायेके मबीत थःपिनिगु रणनीति जूगु तालिवानं न्ह्यथंगु दु ।