जापानय् ब्वःगु तच्वःगु भुखाय् लिपा सुनामीया चेतावनी बिउगु दु। भुखाय् ७ म्याग्निच्यूड जुगु मापन जुगु दु। भुखाय्या केन्द्र दक्षिण पश्चिम क्षेत्रया मियाजाकी प्रान्त खः।

भुखाय्या हुनिं मियाजाकी व कोची प्रान्तय् सुनामी वइगु सम्भावना दू धका अधिकारीपिन्सं धाःगु दु।जापानया सरकारी समाचार एजेन्सी एनएचइया कथं भुखाचं गुलि क्षति जूगु खः धइगु विवरण धाःसा वगु मदुनि।

बंगलादेशय् गठन जुइत्यंगु अन्तरिम सरकारया दुजःपिन्सं थौं शपथ ग्रहण यायेगु तयारी याःगु दु।

नोबेल पुरस्कार विजेता मुहम्मद युनुसया नेतृत्वय् सल्लाहकार परिषदं थौं शपथ ग्रहण यायेगु तयारी दु धका बीबीसीं बंगलादेशया सेना प्रमुख जनरल वकार जमानयात उद्धृत यासें जानकारी ब्यूगु दु। थौं बहनी ८ ताः इलय् सपथ ग्रहण याइगु जूगु दु।

सल्लाहकार परिषदय् १५ म्ह दुजः दइगु सम्भावना दु धका सेना प्रमुखं धाःगु दु। प्रधानसेनापति वाकरं नं स्वन्हु प्यन्हुया दुने बंगलादेशया अवस्था सामान्य जुइगु धाःगु दु।

विद्यार्थीतय्सं न्ह्याकूगु आरक्षण विरोधी आन्दोलन हिंसात्मक रुप कायेवं प्रधानमन्त्री शेख हसिनां राजीनामा बियाः देय् त्वःताः वःगु खः। तत्कालीन सेना प्रमुख वाकरं अन्तरिम सरकार गठन यायेगु कुतः याःगु खः।

वयां लिपा आन्दोलन यानाच्वंपिं विद्यार्थीपिनिगु माग कथं नोबेल पुरस्कार विजेता युनुसया नेतृत्वय् सरकार गठन यायेत्यंगु खः।

बंगलादेशय् अन्तरिम सरकारया प्रमुख मुहम्मद युनुस जूगु दु। युनुसं म्हिगः मंगलवाः जक अन्तरिम सरकारया नेतृत्व यायेत तयार जूगु खः।

मंगलवाः राष्ट्रपति भवनय् जूगु छगु बैठकय् नोबेल पुरस्कार विजेता युनुसयात हे अन्तरिम सरकारया प्रमुखय् ल्यउगु दु धका अन्तर्राष्ट्रिय सञ्चारमाध्यमं धाःगु दु।

उगु बैठकय् आरक्षण आन्दोलनया नेतृत्वयाःपि विद्याथी याःगु प्रतिनिधि व सेनाया प्रमुख न दइगु जूगु दु। मुहम्मद युनुस गरिबी विरुद्ध ल्वाउगु कारण विश्वप्रसिद्ध नोबेल शान्ति पुरस्कारपाखे सम्मानित जूयादीम्ह खः।

‘गरिबपिनिगु बैंक’ पाखे म्हसिउम्ह युनुसयात आन्दोलनकर्ता विद्यार्थीतय्स अन्तरिम सरकारया प्रमुख कथं प्रस्ताव याउगु खः।वयकः पूर्वप्रधानमन्त्री शेख हसिनाया कट्टर विरोधी खः।

थौकन्ह्यः वयकः वासः यायेगु झ्वलय् फ्रान्सय् दिइ। याकन हे स्वदेश लिहावइ धका धाःगु दु।

बंगलादेशय् प्रदर्शनकारीपि प्रधानमन्त्री निवासय् दुहावःगु दु। प्रधानमन्त्री शेख हसिना छु ई न्ह्यः जक प्रधानमन्त्री निवास त्वःतूगु खः।

प्रधानमन्त्रीं छु ई न्ह्यः जक राजीनामा बिइ धुकुगु दु धका सञ्चारमाध्यमं धाःगु दु। सरकारी रोजगारीइ लागू जूगु कोटा प्रणालीविरुद्ध विद्यार्थीतय्स आन्दोलन याःगु खः।

आन्दोलन तच्वय् वं अदालतं कोटा प्रणालीए यक्कोे सुधार यायेमाःगु आदेश बिउगु खः। अय्न आन्दोलन दिउगु मदुनि। लिपागु इलय् हाकन प्रधानमन्त्री शेख हसिनाया राजीनामा फ्वसे आन्दोलन याःगु खः।

हिंसात्मक आन्दोलनया झ्वलय् म्हिगः आइतवाः जक ९१ म्ह सी धुकुगु दु।

अमेरिकां थः नागरिकपिन्त तत्काल लेबनान त्वःतेत इनाप याःगु दु। मध्यपूर्वय् अप्वया वनाच्वंगु तनावयात ध्यानय् तयाः लेबनानया राजधानी बेरुतय् च्वंगु अमेरिकी दूतावासं थः नागरिकपिन्त गुलि फु उलि याकनं लेबनान त्वःतेत इनाप याःगु दु।

बीबीसीया कथं बेलायती विदेशमन्त्री डेभिड लाम्मी नं थः नागरिकतय्त लेबनान ल्ययत धाःगु दु। वय्कलं थ्व क्षेत्रया अवस्था तीव्र गतिं स्यनेफुगु ख्याच्वः न बियादीगु दु।मेखे जोर्डनया विदेशमन्त्रीं चेतावनी बियाः थः नागरिकपिन्त तत्काल लेबनान त्वःतेत धाःगु दु।

तेहरानय् बुधवाः हमासया नेता इस्माइल हनियेया मृत्यु लिपा इरानं इजरायल विरुद्ध बदला कायेगु धाःगु दुसा मध्यपूर्वय् तनाव अप्वइगु सम्भावना अप्वःगु दु। इजरायलं बेरुतय् हिजबुलया कमाण्डर फुआद शुकरयात हत्या याःगु दाबी याःगु छुं घौ लिपा हनियाया मृत्यु जूगु खः। बीबीसीया कथं थ्व हे घटनाक्रमया दथुइ हिजबुलं आइतबाः बहनी उत्तरी इजरायलया बेट हिलेल क्षेत्रय् आपालं रकेट प्रहार याःगु खः।

सामाजिक संजालय् तयातःगु छगू भिडियोय् वायु प्रतिरक्षा प्रणालीं क्षेप्यास्त्र नष्ट यानाच्वंगु खनेदूगु दु। रकेट आक्रमणं गुलि क्षति जूगु खः धइगु जानकारी मदुनि। सम्भावित विकासया अनुमान यासें आपालं एयरलाइन्सं उडान दिकूगु दु। उडानय् च्वनीपिनिगु टिकट नं पूवंक मीधुंकूगु दु।शुक्रवाः इरानया सरकारी टेलिभिजनय् छम्ह उद्घोषकं “विश्वय् असाधारण दृश्य” जुइगु चेतावनी ब्यूगु खः।

इजरायलया प्रधानमन्त्री बेन्जामिन नेतान्याहुं थः नागरिकतय्त धाःगु दु, “चुनौतीपूर्ण न्हि न्ह्यःने दु, वं आपालं ख्याच्वः न्यनाच्वंगु दु व इजरायल छुं नं परिदृश्यया निंतिं तयार दु।”