स्वनिगलय् नागरिक तय्सं न्हिया न्हि सास्ती फयाच्वने माःगु भिडियो सामाजिक सञ्जालपाखे भाइरल जुयाच्वंगु सकसिया सिउगु हे खः।

अथेहे छगु भिडियो प्रहरीपाखे भिच्छुयात याःगु दुब्र्यवहार सामाजिक सञ्जालय् वःगुलि नेपाल प्रहरीया यक्को विरोध जुगु दु। उगु भिडियोय् लँय् वयाच्वम्ह बौद्ध भिक्षुयात प्रहरीतय्स लाकमं प्यकूगु खः। राजेन्द्र महतो नेतृत्वया पुचलं येँयागु उगु प्रदर्शन यायेगु झ्वलय् प्रहरीतय्स लाकमंकि लाकमं प्यकूगु खः । उगु सामाजिक सञ्जालपाखे भाइरल जुइवं नेपाल प्रहरीप्रति नागरिकतय्गु धारणा नकारात्मक जुगु खनेदु।

सरकारं येँया मू मू थासय् निषेधाज्ञा जारी यागु दु। उगु थासय् प्रदर्शन जुलकि प्रहरीं हस्तक्षेप याना वयाच्वंगु दु । वंगु मंसिर ५ गतेनिसे स्थानीय प्रशासनं फिब्बः ख्यलय्निसे न्हुगु बानेश्वर जुया सिंहदरबार न्ह्यने, राष्ट्रपति व प्रधानमन्त्रीया सरकारी निवास जःखः न निषेधाज्ञा तःगु खः । निषेधाज्ञाया झ्वलय् सरकारया मन्त्री तक ज्वःगु दु।

जनमत पार्टी सरकारय् दुगु इलय् उगु पार्टीया अध्यक्ष सिके राउत व सामान्य प्रशासन मन्त्री अनितादेवीयात तक ज्वंगु खः। नागरिक समाज व आमनागरिक तय्त तक निषेधाज्ञा तयातःगु थासय् ज्याझ्व प्रदर्शनयातकि ज्वनेगु यानावयाच्वंगु खः। निषेधित थासय् सू ना न प्रदर्शन यातकि न्ह्याम्हेसित न नियन्त्रण कायेगु झ्वलय् दर्शनकारीयापिन्त प्रहरी हस्तक्षेप यागु खः।

उगु हे झ्वलय् लँय् वयाच्वपि भिच्छुपिन्त तक प्रहरीपाखे हस्तक्षेप यागु खने दु। लोकतन्त्रय् सतक धइगु न्ह्यावलय् नागरिक तयेगु जुइमाःगु खः । सरकारयात थःपिनिगु खँ न्यकेगु निति नागरिक तय्स थःगु खँ तयेगु निति सतकय् वया खँ तयेगु अधिकार संविधान तक सुनिश्चित यानातःगु दु। नेपाःया संविधान २०७२ न नागरिकयात देय्या सार्वभौम अधिकार बियातःगु दु।

अथे धइगु सत्ता निर्माणया अधिकार जक मखु शासन प्रणाली ल्ययेगु अधिकार तक जनतायात बियातःगु दु । अय्न सरकारं नागरिकया आधारभूत अधिकारय् निरन्तर यायेगु कथं हस्तक्षेप यायेगु नीति अख्तियार याना च्वंगु खनेदु । संघीय सरकारपाखे सय्का येँ महानगरया मेयर बालेन शाहं बँपसः तइपिन्त नगर प्रहरीपाखे दुब्र्यहार यायेगु त्वःतुगु मदु।

नगर प्रहरीयात कानूनय् मदुगु अधिकार छ्यला छु दिं न्ह्यः जक कठिं दाया छु घौ नियन्त्रणय् कायेगु ज्या यागु खः । महानगरया प्रहरी तय्सं चिधःपि ब्यावसायीतय्त सतकय् लिइगु ज्या जुयाच्वंगु दु। शान्ति वाटिकाय्् प्रर्दशन यायेगु रोके याःगु दु। थुकिया अर्थ भिक्षुपिन्त दायेगु छगु बिस्कं जुगु घटना मखु । नागरिकयात दमन जुयाच्वंगु छगु दृष्टान्त जक खः। छु ई न्ह्यः जक फुटपाथय् खिपः तयेगु न सरकारं यागु निर्णयया हे निरन्तरता खः।

अथे धइगु भिक्षुपिन्त लाकमं प्ंगुगु धइगु लोकतन्त्रय् खतरा जुगु संकेत कथं कायेगु यायेमाः।