न्याकः तक च्याम्पियन जुम्ह मुम्बई इन्डियन्स इन्डियन प्रिमियर लिग (आईपीएल) २०२४ य् सनराइजर्स हैदराबादनाप ३१ रनं पराजित जुगु दु। मुम्बई थ्व नाप निकः बुगु दु सा हैदराबाद निकः तक त्याःगु दु।

२७८ रनया लक्ष्य ज्वना वःगु मुम्बई न २० ओभरय् न्यागु विकेटय् २४६ रन जक दयके फुगु खः। मुम्बईया तिलक बर्मां ३४ बलय् २ चौका व ६ छक्का नाप ६४ रन, ईशान किशनं ३४, रोहित शर्मां २६, नमन धिर ३० व हार्दिक पान्ड्या २४ रनय् आउट जुगु खःसा टिम डेविड २२ बलय् २ चौका व ३ छक्कानाप ४२ रनय् नट आउट जूगु खः।

हैदराबादया जयदेव उनादकट व प्याट कमिन्सं निगु निगु विकेट काःगु खः। राजीव गान्धी इन्टरनेसनल रंगशालाय् टस बूया न्हापां ब्याटिङ यागु हैदराबादं निर्धारित २० ओभरय् ३ विकेटय् २७७ रन दयकूगु खः। आईपीएलय् दकलय् अप्पो रन सन् २०१३ य् रोयल च्यालेन्जर्स बेंगलुरुं पुणे वारियर्सविरुद्ध २० ओभरय् ५ विकेटय् २६३ रन दयकूगु खः।

उगु कीर्तिमान हैदरावादं त्वाःथला आःतक दकलय् अप्पो रन दयकूगु इतिहास तःगु दु। हैदराबादया हेनरिक क्लासेनं ८० रनया नटआउट, एडेन माक्ररमं ४२ रन नटआउट जुया म्हितूगु खः।

अथेहे टविस हेडं ६२ रन, अभिषेक शर्मां ६३ रन दयकूगु खः। हार्दिक पाण्ड्या, जेराल्ड कोट्जी व पियुष चावलां छगु छगु विकेट काःगु खः।

Categorized in कासा