दाफा महोत्सव खुलातक्क जुइगु
लहनान्यूज सम्वाददाता | कौलागा एकादशि ११३६ (अक्टोबर २६ २०१६)
नेपालमण्डल टेलिभिजनं ग्वसाः ग्वयेत्यंगु दाफा महोत्सव खुलातक्क जुइगु जूगु दु ।
थौं नेपालमण्डल टेलिभिजनं महोत्सवया जानकारी बीत यलय् ग्वसाः ग्वःगु पत्रकार सम्मेलनय् स्वला न्ह्याकेगु योजना दुगु महोत्सव खुलातक्क न्ह्याइगु धाइगु खः । न्हापा सच्छिगु पुचःया ब्वति दइगु अनुमान याःगुलिइ २सलं मल्याक्क पुचलं महोत्सवय् ब्वति काःवःबलय् महोत्सवयात खुला न्ह्याकेत्यनागु जानकारी पत्रकार सम्मलेनय् बिल ।
पत्रकार सम्मेलनय् नेपालमण्डल दाफा महोत्सव निर्देशन समितिया नायः संस्कृतिविद डा.सत्यमोहन जोशीं राज्यं स्वंगू स्वंगू प्रतिष्ठान दयेकातलं नं तनावनेत्यंगु अमूर्त संस्कृतिप्रति सुनां नं ध्यान मब्यूगु धासें थज्याःगु महोत्सवं थुगु पक्षय् राज्यया नं ध्यान सालीगु धयादिल । पिने पिने देशय् हरेक जातीय पुचःया थःथःगु अर्केष्ट्रा बाजं दःसां नेवाःतय् मदुगुलिइ थुगु महोत्सवं दाफा बाजंयात हे नेवाः अर्केष्ट्राया रुपं विकास याइगु सम्भावना दुगु डा.जोशीया धापू खः ।
लहनान्यूजलिसे खँ ल्हासें महोत्सवया नितिं दाफा पुचलं क्यंगु थुकथंया उत्साहं थःपिन्त नं तःधंगु हःपाः ब्यूगु नेपालमण्डल टेलिभिजनया प्रवन्ध निर्देशक भाइकाजी महर्जनं धयादिल । दाफा संस्कृतियात ल्यायम्ह पुस्ताया दथुइ यंकेत थुकथंया महोत्सवया लिसें थःपिन्सं फुकथं पलाः न्ह्याकाः तुं वनेगु महर्जनया धापू खः ।
पत्रकार सम्मेलनय् निर्देशन समितिया नायः डा.जोशीलिसें न्वकू नेपाल डंगोल, छ्यान्जे श्रीकृष्ण महर्जन, दुजः रामकृष्ण दुवाललिसें नं पत्रकारपिन्सं न्यंगु न्ह्यसःया लिसः बियादीगु खः ।
- क्वःपुजानिसें दाफा महोत्सव
वइगु कौलागा त्रयोदशि (कार्तिक १२) शुक्रबाःया क्वःपुजाया दिनय् यलया ललितपुर मलय् राष्ट्रपति विद्यादेवी भन्डारीं दाफा महोत्सवया उलेज्या यानादीगु जूगु दु ।
खुलातक्क न्ह्याइगु महोत्सवय् येँ, यल, ख्वपया लिसें मकवानपुर, काभ्रे, भोजपुर, दोलखापाखें २सलं मल्याक दाफा पुचःया ब्वति दु । २सलं मल्याक्क पुचलं पालंपाः वाःया शुक्रवाः व शनिबाः थःथःगु न्ह्यब्वया न्ह्यब्वइ ।
महोत्सवया उलेज्याकुन्हु वरिष्ठ वाद्यगुरु न्हुछेबहादुर डंगोल व वाद्यगुरु धर्म मुनिकारया निर्देशनय् सच्छिम्ह स्वयां आपाः कलाकारपिन्सं न्ह्यब्वइगु नेवाः अर्केष्ट्रालिसें महोत्सवया झ्वलय् छम्हेसिनं २०गः दबदब थाइगु, व हे कथं छम्हेसिनं १९गः क्वंचाखिं थाइगु न्ह्यब्वयात महोत्सवया विशेष आकर्षण जुइगु ग्वसाः खलकं न्ह्यथंगु दु ।
ज्याझ्वलय् दाफा बाजं मू विधा कथं न्ह्यब्वयेत्यंगु दुसा ल्यू विधाकथं थीथी बाजंया तालय् ख्वाःपाः प्याखं, लाखय् प्याखं, ख्याः, कवं प्याखंलिसें धिमय् प्याखं, बाँसुरी बाजनय् प्याखं आदि न्ह्यब्वयेगु जानकारी ब्यूगु दु । थीथी दाफा पुचलय् महर्जन, डंगोल, मुनिकार, तुलाधर, श्रेष्ठ, मानन्धरलिसेंया जातीय पुचःया ब्वति दु ।
महोत्सवपाखें तनावनेत्यंगु दाफा संस्कृतियात च्वन्ह्याकेत तिबः बीगु लिसें दृश्य अभिलेखीकरण नं यायेगु आज्जुं महोत्सव यायेत्यनागु नेपालमण्डल टेलिभिजनं न्ह्यथंगु दु ।
Categorized in राष्ट्रिय
